Festîvala Cinîyan a Rojbîne emser reya hîrêyine virazêno. Endamanê komîteya amadekare ra temsîlkara Têkilîyanê Teberî yê TJK-F’yî Hazal Karakûşe, vervatoxanê TJK-F’yî ra Şengul Karataşe û endama TEVÇAND’î Remzîye Pîrane; xeylî cinîyî û sazîyanê femînîstan ê Fransayijan zî seba tewrbîyayîşê festîvale veng da.

Festîvala emserî bi slogana “Xoverdayîşê cinî rayîrê azadîye akeno” Parîs Val de Marne Parc Interdepartmental Sports de virazêna.

Kesanê ke sebba tewrbîyayîşê festîvale veng da vat, “Festîvala xo de ma rastîyanê cuye qîrenê û vane ‘Dinyayêka bîne mumkun a’. Bi nameyê cinîyanê ke ameyê kiştene, bi nameyê cinîyan ê xoverdayoxan ma waştişê azadîye kenê.”

Festîvale do Yewşeme saet 12 de dest pê bikero. Pinar Aydinlare, Denîz Demane, Meral Alkane, Xecê Yaşare, Rûken Newa û Dîlana Rojarya do hunerê xo pêşkêş bikerê.

Seba domanan zî do wareyê festîvale de parkêk bêro awankerdene. Heman wextî de do xeylî stantî zî bêrê ronayene.

Karakûşe hemverê kişîyayîşê cinî û domanan û hemverê talankerdişê xoza veng da ke tewrê festîvale bibê û vat, “Ma veng danê şarê xo yê welatperwerî ke bi reng û xasekîya xo, bi heybetê paştdayîşê cinî tewrê festîvale bibê.”

Karataşe û Pîrane zî veng da heme cinîyan ke Yewşeme meydanê festîvale de bê.

Festîvale do adresa Chemin des Bœuf, 94000 Créteil virazîyo.

Şexsîyet û sazîyanê ke paştî danê festîvale:

Senatora Val de Marne û sereka verêne ya Delegasyona Heqanê Cinîyan Laurence Cohene, sereka Lîgê Heqanê Cinîyan ê Mîyanneteweyîyî Annie Sugiere, hemkoordînatora Partîya Çepe ya Fransa Danielle Simonnete, Kolektîfo Neteweyî yê Heqanê Cinîyan (CNDF), Keyeyê cinîyan ê Montreuilî, parlamentera Val de Marne Mathilde Panote, Senatrîya Côtes d’Armor Christine Prunarude, Rayraşîyayîşê Cinî yê Dinya, Keyeyê Cinîyan ê Parîsî, Femînîstê France Insoumise, Têgêrayîşê Cinîyan o Sosyalîst (SKB), Têgêrayîşê Aşitîye, Têgêrayîşê dostanîya mabênê şaran ê hemverê nîjadperestîye (MRAP), Têgêrayîşê Cinîyan ê Kurdan o Demokratîk ê Fransa (CDK-F) û Yewîya Wendekaranê Kurdan ê Fransa (UEKF).