Pinar Başa ke qezaya Pêrtagî ya Dêrsimî ra ya la Îzmîr de ciwîyena zîynetan virazena û zîynetê ci eleqayêkê pîlî vînenê. Hîrê serre ra nata zîynetê Başe hetê bazirgananê Îzmîrî ra zî zaf eleqa vînenê. Başe bi paştdayîşê Şaredara Pêrtagî Ruhan Alanî seba ke cinîyan ê Pêrtagî rê warêkê îstîhdamî awan bika Pêrtag de kargehêk akerd.

Terw tay 200 cinîyî beşdarê kargehî benê û perwerdeyê viraştişê zîynetan ra ber goreyê  hunerê destan zî fikrê cîyayî kargeh de ameyî meydan. Nê fikran ra yew zî awankerdişê kooperatîfa cinîyan a. Bi projeyê kooperatîfe yeno armanckerdene ke cinîyî zîynetî bikê û biroşê.

Pinare Baş Ajansê Mezopotamya reyde qisey kerd û vat: "Seba ke ez goreyê waştişanê bazirganan zîynetan bivirazê ganî mi berardişêko zêder bikerdêne. Seba naye zî hewceyê mi bi ekîbêke estbi. Mi waşt ke ez ekîba xo cinîyanê qezaya xo ra bîyara meydan. Mi hewteyêk de amadekarîya xo safî kerde û dest pê xebata kargehî kerd. Qasê 200 cinîyan muracatê kargehî kerd û waşt ke perwerdeyê viraştişê zîynetan bigêrî. Ma dest pê xebate kerd û ma bîyî ekîbêka pîle. Mi dî ke pêro cinîyê kargehî eşkenê karanê pîlan bikê. Naye ra pey ma wazenê binê kooperatîfêke de xebata xo dewam bikê. Seba ke ma kooperatîfe awan bikê dest pê xebate kerd. Eke proses sey waştişê ma bibo ma do 8ê adare de kooperatîfe abikê. Cinîyê ke yenê tîya hetê rewşa madîye ra baş xirab ê. Ez wazena ke cinîyê ke perwerdeyê xo qedînenê do tewrê berardişî bibê û azadîya xo ya ekonomîkî bîyarê ca."