Şorişê Rojawanî ra nata cinîyê Rojawanî serkêşîya Kongreya Starî de bi xurtî îstîhdam benê û ekonomîya herême rê gan danê. 

Dêrik, Tirbêspiyê, Girkê Legê, Amûdê, Qamişlo, Hesekê, Dirbêsiyê, Şedadê, Til Temir, Kobanê, Şehba, Tebqa û Reqa kooperatîfanê zîretî de qasê 63 hezar hektar erazîyan de 500 cinîyî xebitîyenê. Rojawan de bi temamî 78 kooperatîfî est ê ke nînan de terw yau 631 cinîyî xebitîyenê.

Vervatoxa Ekonomî ya Kongreya Starî Gulê Murad derheqê babete de ANFyî rê qisey kerd.

Gulê Murad vist vîrî ke şorişî ra verî cinîyî warê ekonomî ra ameybî dûrvistene û vat: ''Netîceya têkoşînêkê pîlî de cinîyî resayî nê rojan. Cinîyî verê cû xo sey aîdê warê ekonomî nêhesibnayêne la nika cinîyî serkêşîya ekonomî kenê. Rojawan de bi hawayêkê fermî 2015 de ekonomîya cinîyan ameye rêxistinkerdene. Bi xurtkerdişê ekonomî ma verê koçkerdişî zî gênê. Ma warê ekonomî de modelê komunalî anê ca. Ma bi hawayêkê stratejîkî nêzdîyê ekonomîya cinîyan benê.

Ma çend zîretî aver berê ekonomîya ma zî do hende aver şora. Coka ma par kooperatîfê xo kerdî xurt. Ma Şedadê, Til Temir, Hesekê, Dirbêsiyê û Cizîre zî bîrê awe akerdî. Ma nêzdîyê 8 hezar darê meyweyan ramitî, 25 firin û dikanî akerdî. Ma waranê zîretî de, mîyanê kooperatîfanê xo de perwerde zî danê. Çunke kooperatîfan de keyeyî xebitîyenê û ma nêwazenê ke domanî perwerdeyî ra dûrî bikewê.''

Gulê Mûrad ard ziwan ke dewleta tirke xîret kena ke ekonomîya herême çin bikera û vat: ''Seba pawitişê destkewteyanê cinîyan ma kenê ke kooperatîfanê xo goreyê şert û mercanê şerî bivisnê dewre. Rixmê hêrişan zî seba averberdişê ekonomî û ekonomîya serkêşîya cinîyan ma do xîretanê xo rê dewam bikerê.''