Cinîyan seba 8ê Adare Roja Cinîyanê Dinya ê Kedkaran xeylê bajaran ra startê xebatan dayî.

MELETÎ

Aktîvîstanê TJAyî ke seba ke paştî bidê cinîyanê mexdûran herêma Serhedî ra ameyê Meletî seba rêza çalakîyanê 8ê Adare eşkerayîye daye.

Hemsereka DBPyî yê Wanî Şengule Polat eşkerayîye wende. Polate dîyar kerd ke ê bi nameyê TJAyî roja yewine ya erdlerzî heta nika herême de bîyê û hewl dayo ke birînanê cinîyanê mexdûran bipêşê. 

Dima Hemseraka Meletî yê HDPyî Perîhane Yucekaya zî ard ziwan ke 25 rojî erdlerzî ra vîyartî la hema zî hewcedarîyê bingeyîn ê cuye nêameyê peydakerdene û hîna zaf mexdûrîyetî milê cinîyan ser o meneno. Yucekaya dîyar kerd ke ê zî do bi nameyê HDPyî herême ra bibê û birînanê şarê xo bipêşê.

ADANA

TJA û Meclîsê Cinîyan ê HDPyî Adana de zî awanîya HDPyî de kombîyayîşê çapemenîyî viraşt. Hemsereka Adana yê HDPyî Hêlîne Kaya eşkerayîye daye û dîyar kerd ke îqtîdar bi polîtîkayanê şer û şîdetî welat ver bi feqêrîye berdo û nê erdlerzî de zî şarê xo tena verdayo. Yucekaya vat, ‘‘Ma cinîyî ma do xirban hewanê û ma do cuyêka neweye awan bikerê.’’

MÊRSÎN

TJA û Meclîsê cinîyan ê HDPyî Mêrsîn de awanîya HDPyî de kombîyayîşê çapemenîyî viraşt û startê 8ê Adare da. Parlamentera HDPyî yê Mêrsînî Fatma Kurtulan û xeylê cinîyî beşdarê kombîyayîşî bîyê. Çigdeme Goksoy nameyê cinîyan ser o eşkerayîye wende û programê 8ê Adare pare kerd.

ÎSTANBUL

Îstanbul de zî TJA û Meclîsê Cinîyan ê HDPyî seba xebatanê 8ê Adare bi amancê paştîdayîşê cinîyanê tepîşteyan ê qezayanê Umranîye Uskudar, Ataşehîr, Sancaktepe, Çekmekoy, Pendîk, Fatîh û Esenyûrdî rê bi raya PTTyî tepîşteyan rê kartî erşawitî.

ÎZMÎR

Îzmîr de zî TJA û Meclîsê Cinîyan ê HDPyî bi TIRA MORe ya hetkarîye seba mexdûranê erdlerzî yê Hatayî erşawitî. Hemsereka Îzmîrî yê HDPyî Berna Çelîk qisey kerd û dîyar kerd ke emser ê 8ê Adare bi paştîdayîşê cinîyan vîyarnenê û ê do hetkarîya cinîyanê mexdûran ê erdlerzî bikerê.