Rayberîya Platformê Cinîyan ê Dîcle yê Amedî (DAKAP) pê şîarê 'Wext wextê azadîya cinîyan o' çalakîya rayraşîyayîşî kerde. Wekîlê HDPyî Remzîye Tosun û Dersime Dag, Hemsereka Pêroyî ya DBPyî Salîha Aydenîz, Hetkara Hemsereka Partîya Sosyalîste ya Bindestan (ESP) Beycane Taşkiran zî tewrê çalakîye bîyî.

Çalakîye de sloganê sey 'Cinîye, Cuye, Azadîye', 'Denîze Poyraz bêmerg a', 'Ayşe Gokkan rûmeta ma ya', 'Biciwîyo xoverdayîşê cinîyan' ameyî vatene

Polîsan pankarta 'Wext wextê azadîye yo' kerde bahane û xîret kerd ke çalakîye asteng bikerê. La cinîyan pê tîlîlî û çepikan  nêrazîbîyayîşê xo mojna polîsan û heta parka Rojava çalakîya rayraşîyayîşî kerde.

Parke de Hemsereka HDPyî ya Amedî Gulîstane Atasoy qisey kerd û pare kerd ke xoverdayîşê cinîyan do ser bikewê. Atasoye vat: ''Ma seba azadîye û têdûştîye tîya de yê, seba ke bibê vengê Gultane Kişanak, Sebahate Tuncel, Leyla Guven, Ayşe Gukkan û Gonule Erden tîya de yê. Ma do sere wedarnê.''

Dima Vervatoxa DAKAPî Çagla Îzgî eşkerayîye wende. Eşkerayîye de ame parekerdene ke cinîyî maruzê her tewirê şîdetî manenê, tepişîyenê yan zî yenê destbendkerdene. Eşkerayîye de seba Denîze Poyraz, Gulîstane Doku, Îpeke Er, Ayşe Gokkan, Leyla Guven, Emîne Şenyaşar, Çîleme Dogan, Başake Cengîz edalet ame waştene. Eşkerayîye de wina ame vatene: ''Ma do qetî Peymana Îstanbulî ra fek vera medê û seba heqanê xo, xo ver bidê.''

Salîha Aydenîz da zanayene ke cinîyê xoverdayoxî do rayîrê înan roşnî bikerê.

Çalakîye pê sloganê 'Cinîye, Cuye, Azadîye' qedîyaye.