Pêro dinya de her hîrê cinîyan ra cinîyêke rastê teda, şîdet, tecawuz û kerdişanê xiraban yena. Hîrê cinîyan ra cinîyêke yena manayqa mîlyarêk cinîyan. Emser venga mîlyarêk cinî û camêrdan ame kerdene ke ''Roja Waştîyan'' de vera şîdetî wurzê payan ser.

Kampanyaya One Billion Rising (ORB-Mîlyarêk Cinîyî Wurzenê Payan Ser) pare kerd ke pêro dinya de cinîyî do vajê ''Hînî bes o! Wa peynîya şîdetî bêra ardene'' û bivejîyê meydanan. ORB kampanyayêka global a ke çarçewa têgêrayîşê V-Dayî de ke hetê femînîste û nuştoxa drama ya amerîkayîje Eva Ensler ra êlula 2012î de ameye awankerdene. ORByî 14ê sibata 2013î de çalakîya xo ya verêne kerde. Her serre pêro dinya ra zaf kesî tewrê kampanyaya ORByî benê. 

One Billion Rising bi eşkerayîyêka nuştekîye pare kerd ke ê  vera şîdetî, pederşahî, xizanî, emperyalîzm yê. ORByî da zanayene ke pêro dinya de her hîrê cinîyan ra cinîyêke mexdurê şîdetî û tecawuzî yê ke na rewşe zî astêka berze de bitehluke ya. Zaf welatan de ke bi hawayêkê çalakî paştî dayîyeno kampanya keyepelê înternetî ameyî akerdene. Almanya, Fransa û zaf welatanê bînan de keyepelî ra derheqê çalakîyan de zanayîşê sey ca û wextê çalakîyan yenê dayene.