Platformê Cinîyan ê 8ê Adare Kadikoyê Îstanbulî de bi şîarê ''Vera feqîrîye, şîdet û şerî têkoşînê ma est o'' têhetameyîşê cinîyan organîze kerd.

Namzeda Şaredarîya Bajarê Pîlî yê Îstanbulî yê DEM Partî Merale Daniş Beştaş, wekîlê cinîyî û bi seyan cinîyî verê banê DEM Partî yê qeza bi kincanê xo herêmî ameyî têhet. Cinîyî bi erbanê, çapikan,tîlîlîyan û deyîranê kurdkîyan govende girewte.

Aktîvîte de sloganê “Jin, jiyan, azadî”  û “Bijî berxwedana zindanan" ameyî vatene û xoverdayîşê tepişteyanê cinîyan ame selamkerdene.

Aktîvîstanê Têgêrayîşê Cinîyan ê Azadan  (TJA) û Dayîkanê Haştîye zî bi pankaratanê xo bale ante tecrîdê Îmralîyî û têkoşînê cinîyan ser.

Nuqtaya cigêrayîşê polîsan de polîsan pankartê cinîyan ê TJA arê dayî û dirnayî. Cinîyan verê nê hêrsê xo ard ziwan û vat cinîyî do şîdetê camêrd-dewlete birijnê.

Metnê çapemenîye kurdkî hetê Bêrîvane Saruhan ra û tirkî hetê Şenaye Kumuz ra ame wendene. Eşkerayî de bale ameye antene şîdetê dewlete û camêrdan ê vera cinîyan ser û mesajê xurtkerdişê têkoşînî ameyî dayene.

Cinîya vist vîrî ke vera cinîyan şîdet û hêrişê cînsî zêdîyenê û ame vatene ê semedê cuyeya azad û seyyewbîne xoverdayîşê xo bidomnê. Cinîyan vat: Ma do vera feqîrîye, şîdetê camêrdan û şerî kuçeyan cameverdê û semedê heq û cuyeya xo têkoşîn bikerê. Vera heme hêrişan têkoşînê ma est o. Wa biciwîyo 8ê Adare, wa biciwîyo paştdayîşê cinîyan.