Cinîyê ke vizêr xeylêk bajaranê Vakurê Kurdîstanî û Tirkîya de vejîyayî waran qirkerdişê cinîyan protesto kerdî ke çend şino zêdîyenê.

Amed de hetê Platformê Cinîyan ê Dicle Amedî û Torra Têkoşînê bi Şîdetî yê Diyarbekirî ra Meydanê Şêx Sêîdî ra heta cayo ke Bedriye Işik Sûr de hetê mêrdeyê xo çawiş Muhammed Recai Işikî ra ameye qetilkerdene,rayraşîyayîş ame kerdene.

Rayraşîyayîşo ke bi şîarê ''qirkerdişê cinîyan polîtîk o'' ame kerdene wekîl û hemşaredarê DEM Partî, aktîvîste TJA, temsîlkarê rêxistinanê komelê demokratîkî û xeylêk cinîyî tewrê ci bîyî. Çalakîye de sloganê sey “Jin jiyan azadî”, ''Dewleta kiştoxe do hesab bido''  û ''Camêrd dano piro, hukm paweno'' ameyî vatene. Eşkerayîye de bale ameye antene wendekare Rojbîne Kabaiş ser ke 27ê êlule ra nata Wan de vînîbîyaye ya û ame vatene ke cinîyî seba ke koletîya camêrdan qebul nêkenê yenê qetilkerdene.

Dêrsim de  hetê Platformê Cinîyan ê Dêrsimî ra vera qirkerdişê cinîyan çalakîya protestoyî ameye organîzekerdene. Cinîyî Kuçeyê Hunerî ra heta Meydanê Seyîd Rizayî bi slogananê ''Jin Jiyan Azadî'' rayra şîyî. Cinîyan vat ê vera îqtîdarê AKP-MHPyî kuçeyan de yê ke kiştoxan, tewcawuzkaran paweno. Eşkerayîye de ame vatene ke Gulîstane Doku 5 serrî yo nêameyî vînayene û 11 rojî yo Rojbîne Kabaiş ra xebera nîna girewtene. Cinîyan vat heta ke ê kuçeyan de biasayîşî bieşkê bigêrê û her warî de verê kiştox û tecawuzkaran bigîrî ê do têkoşînê xo bidomnê.

Reyna xeylêk bajaranê bînan ê Tirkîya û Kurdîstanî de cinîyî vejîyayî waran vera qirkerdişê cinîyan û îqtîdaro ke kiştoxanê cinîyan paweno hêrsê xo ard ziwan û vat ê do rixmê heme zextan têkoşînê xo rê dewam bikerê.