Vera hêrişanê serê ziwan û kulturê kurdan perey Amed de hetê Komeleya Cigêrayîşanê Ziwan û Kulturî yê Mezapotamya û Enstîtuya Kurdî ra aktîvîteya kurdkî ameye kerdene.  Aktîvîte de govende ameye girewtene, dersa kurdkî ameye dayene.

Cinîyê ke tewrê aktîvîte bîyî vera zext û hêrişanê vera kurdkî nêrazîbîyayîş mojna ra.

Sereka Komeleya Edebîyatkaranê Kurdkî Fatma Taşli Tunç bale ante ser ke nê hêrişî newe nîyê û vat: ''Polîtîkayê înkar û asîmîlasyonî bi seserran o dewam kenê. Xora çew heqanê ma tepsîya zerdine de ma rê teqdîm nêkeno. Heq nêdîyeno, yeno girewtene. Ma do heqanê xo bi têkoşînî bigerê.Ganî şarê kurdî vera nê zulmî bêveng memano.''

Perî Kaya zî hêrişê vera kulturê kurdan sey leteyêkê polîtîkaya şerê taybetî name kerdî û vat: ''Eslê xo de bi nê polîtîkayan wazenê ziwanê kurdan û kulturê ci çîn bikerê. Ganî şarê kurdî vera nê zext û hêrişan wayîrê ziwan û kulturê xo bivejîyo. Eke wayîrê ziwan û kulturê xo mevejîyê ma do rayîrê çînbîyayîşî de aver şirê. Coka ganî her kes wayîrê ziwan û kulturê xo bivejîyo.''

Fatma Budak Guler zî ard ziwan ke ziwan û kultur estbîyayîşê şarêkî yo û waşt wa şarê kurdî vera nê polîtîkayan her ca de wayîrê estbîyayîşê xo bivejîyo.

Nesrine Şanli zî polîtîkayê vera ziwan û kulturê kurdan sey problemê komeklî hesibnayî û vat: ''Nê polîtîkayî teberê huqûq û merdimîye de yê.''