Têgêrayîşê Cinîyan ê Azadan (TJA) û Meclîsê Cinîyan ê HDPyî çarçewa 25ê Teşrîna Peyêne Roja Têkoşînê Vera Şîdetê Serê Cinîyan de Mersîn, Mêrdîn, Ankara, Şirnex de  panel û kargehî viraştî.

Şirnex

Qezaya Hezexî ya Şirnexî de bînaya HDPyî de derheqê îstîsmarê domanan de kargehêk ame kerdene. Hemşaredara Sîlopî Adalete Fîdan û xeylêk cinîyî tewrê bernameyî bîyî. Salona kargehî de pankarta bi nuşteyê 'Domanî ameyoxê ma yê, ameyoxê ma tarî mekerê' ameye daliqnayene.

Aktîvîsta Zozane Înan kargeh de qisey kerd û vat: ''Ganî ma keye, dadîyanê xo vera şîdet û tecawuzî bipawê, xo rêxistin bikerê û şîdet eşkera bikerê.''

Mêrdîn

Mêrdîn de cinîyî bînaya HDPyî de ameyî pêser. Wekîla HDPyî ya Mêrdînî Pero Dundar aktîvîte de qisey kerd û îfade kerd ke seba qedînayîşê şîdetî têkoşînê înan do dewam bikero. Dundare venga cinîyan da ke 25ê teşrîna peyêne de Qoser de tewrê rayraşîyayîşê înan bibê.

Adana

Platformê 'Ma do verê kişîyayîşê cinîyan bigêrê' (KCDP) û Meclîsanê Cinîyan ê Adana Parka Ataturkî de eşkerayîyêke daye. Endama Meclîsanê Cinîyan Duygu Baytekîn ard ziwan ke şîdetê vera cinîyan her roje zêdîyeno û vat ke seba ke verê şîdet, merganê şikdaran, kişîyayîşê cinîyan bêro girewtene ê do Peymana Îstanbulî bidê caardene.

Anqara

Meclîsanê Cinîyan ê Anqara Parka Kuguluyî de eşkerayîyêke daye û pankarta 'Seba ke verê şîdet, merganê şikdaran, kişîyayîşê cinîyan bêro girewtene ê do Peymana Îstanbulî bidê caardene' akerde. Eşkerayîye de forografê Gulîstane Doku, Ayşe Karaman û Cerene Damar ameyî kiriştene.

Mizgîne Sumbul eşkerayîya meclîsan wende û vat: ''Camêrdê kiştoxî polîtîkaya bêcezaverdişî ra hêz gênê. Ma do Peymana Îstanbulî bîyarê ca û têkoşînê cinîyan bikerê pîlêr.''

Dadîya Ayşe Karaman Ferîde Karaman zî vat: ''Kiştoxê kênaya mi teber de gêreno. Zerrîya mi vêşaye. Heta ke ez weş biba ez do peyê na dewa nêverda.''

Mersîn

Meclîsanê Cinîyan ê HDK û HDPyî panelê bi nameyê 'Şîdetê dewlete-camêrd, metodê têkoşînê cinîyan û Peymana Îstanbulî' serûber kerd. Panel de ke Salona Kongre ya Şaredarîya Mersînî de virazîya, pankarta 'Ma vera şîdetê camêrd-dewlete têkoşîn kenê' abîye. Panel bi deqayêkê rêzgirewtişî dest pêkerd û sînevîzyonêk ame mojnayene.

Aktîvîsta TJA Derya Aslan panel de verê panelî qisey kerd û vat: ''Senî ke şîdetê vera cinîyan îdeolojîk o, têkoşînê ma zî îdeolojîk o.''

Wekîla HDPyî ya Amedî Semra Guzel zî vat: ''Şîdetê camêrdan bi destê dewlete beno meşrû. Vera cinîyan têna şîdeto fîzîkî yan zî cînsî nê şîdeto psîkolojîk, teknolojîk zî esto. Dewlete pê qanûnan verê şîdetê nêgêna çunke îqtîdarê xo na nê şîdetî ser ro.''

Panel pê pers û cewaban qedîya.