Cinîyî sey her serra emser zî 8ê Adare de vejîyenê meydanan. Îstanbul de cinîyî 5ê adare de saete 18.00 de verê Îskeleya Beşîktaşî ya Kadikoyî de bêrê têhet. Platformê Cinîyan ê 8ê Adare emser pê sloganê 'Ma do azadîya xo bivisnê destî' venga cinîyan keno. Cinîyî seba geşkerdişê têkoşînî, seba pawitişê Peymana Îstanbulî, vera polîtîkayanê serê cinîyan û LGBT-Î, vera qeyûman, seba paştdayîşê grevê vêşanîye û vera şîdetê camêrdan, vera DAÎŞî seba paştdayîşî veng danê.

Nameyê platformî ser o Sevgî Ozlem Gulmez ANFyî rê qisey kerd û îfade kerd ke ê seba xoverdayîşî venga cinîyan danê û vat: ''Pandemî de eşkera bi ke pêro bare milê cinîyan de ya. Hem sîstemê karî hem zî sîstemê keyeyî cinîyan ra performansêkê holî pawenê. Camêrdî kar'e keyeyî sey karê cinîyan vînenê. Coka ma emser bi taybetî venga kebanîyan danê. Pandemî de xeylêk cinîyî zî karê xo ra bîyî. ''

Sevgî bale ante Peymana Îstanbulî ser o û vat: ''Ewro hayîya xeylêk kesan pê peymane esta, cinîyî her ca de seba ci têkoşîn kenê. Ez sey xebatkarêke heqanê xo pawena, cinîyê kurdî wayîrê grevê vêşanîye vejîyenê. Ma vera şîdetê camêrdan û dewlete pîya têkoşîn kenê. Ver pêro tedayan ma vanê 'Ma do azadîya xo bivisnê destî' û ma venga pêro cinîyan danê.''