Taybetê Înana (Dayîka Taybete) ke wextê xoverdayîşê xoîdarekerdişî de qezaya Silopî ya Şirnexî de 19ê kanûn a 2015î de hetê nîşandaranê tujan ra ameye qetilkerdene, serrgêra şehadetê ci ya 5. de cayo ke tede ameye qetilkerdene de hetê TJA ra ameye vîrardene.

Hemsereka KCDyî Leyla Guvene, Wekîla HDPyî ya Şirnexî Nurane Îmîr, aktîvîstê TJA, rêxistinê Şirnex û qezayanê ci, Înîsîyatîfê Dayîkanê Haştîye yê Şirnexî û xeylêk hemwalatijî tewrê vîrardişî bîyî. Taxa Nurî ra verbi cayê qetilkerdişê Dayîka Taybete rayraşîyayîşêk ame kerdene. Tîya badê deqeyêke rêzgirewtişî Leyla Guvene qisey kerd.

Dayîka Taybete cinîyêka xoverdayoxe bî

Guvene ard ziwan ke dejê Dayîka Taybete hema zî zerrîya kurdan vêşneno û vat: ''Ma şexsê Dayîka Taybete, Sevê, Pakîze û Fatmayan de heme şehîdanê xo bihurmet yad kenê. Dayîka Taybete cinîyêka xoverdayoxe bî û êyê ke nê xoverdayîşê ci ra tersayî a qetil kerd ke mesjêk bidê komelî. Înan waşt ke cinîyî keye de ronişê. Verî zî bi hêrişê vera Ekîne Wan no mesaj dabi. Ma soz danê Dayîka Taybete ke 7 rojî û 7 şewe cenazaya ci erdî mend, ma do rêça şehîdan de xoverdayîşê xo pîlêr bikerê. Ma do hesabê nayî bipersê.''

Xoverdayîş ciwîyayîş o

Nurane Îmîr zî şexsê Dayîka Taybete de heme şehîdî yad kerdî û vat: ''5 serrî yo edalet kuçeyanê Silopî de erdî de mend. Se beno wa bibo ma do nê wehşetî xo vîrî ra mekerê û vera polîtîkayanê leyminan xover bidê. Vera qirkerdiş û faşîzmî ma vanê xoverdayîş ciwîyayîş o.''

Badê qiseykerdişan cayê qetilkerdişê Dayîka Taybete de vilîkî ameyî ronayene û keyeyê ci ame zîyaretkerdene.