Dayîkanê Haştîye yê Êlihî û Sêrtî bi tîlîlîyan  laçikê xo yê sipîyî yê ke sey sembolê haştîye yenê zanayene, eştî erd û hemkarîya PDK-dewleta tirke protesto kerde.

Çalakîya ke îdarekarê HDPyî zî tewrê ci bîyî de bi nameyê dayîkan dayîke Muhlîse Hînar qisey kerd. Hînare vat: Semedê ver girewtişê şerê waybirayî  ganî heme kurdî çîyo ke destê înan ra yeno bikerê. Ma şerê mabênê kurdan nêwazenê. Kam/e ke biney wayîrê vîjdanî yo ganî vera naye vejîyo. Ma yewîye, haştîye wazenê. Hînî bes o. Wa kurdî bibê yew. Ma bi yewîya neteweyîye eşkenê verê gonîya waybirayî bigerê û eşkenê bikewê ser. Wa mesele masa de bêro çareserkerdene. Ma nêwezenê hînî ciwanî bimirê. Kam/e beno wa bibo ganî verê haştîya bianore abikero. Hînî bes o. Çimanê dayîkan de hesire nêmende. Çareserî masa de ya. Gonî bi gonî nê bi awe bena pake.

Dayîkan badê eşkerayîye bi tîlîlîyan laçikê xo yê sipîyî ke sey sembolê haştîye yenê zanayene eştî war.