Velî Encu yo ke 28'ê Kanûne 2011 de dewa Roboskî de teba birayê ey 34 merdimanê ey cuya xo vîndî kerda, vizêrî ame girewtene. Encu, bi îdîaya "endamîya rêxistine" ame girewtene û ame berdene bi Hepisxaneyê Şirnexî yê Tîpê T’yî.

Ne huqûq ne zî wijdan mendo

Dayîke Halîme Encu ya ke lajê aye Parlamenterê HDP'yî yê Şirnexî yo verên Ferhat Encu û Velî Encu ameyê girewtene û Komkiştişê Roboskî de lajê ci ame kiştene, bale ante serê rewşa lajê xo Ferhat Encu û lajê xo Serhat Encu yo ke komkiştişî de cuya xo vîndî kerda û vat, “Seba ke Ferhatî aşitîye waştêne ame girewtene.  Velî zî bêbextîye eşte vileyê ci. Ma do naye qebûl nêkerê. No ne qerarêkê huqûqî yo ne zî wijdanî yo."

Bêveng mevindê

Dayîke Encu vat, “Velî mendibi, o zî girewt. Lajêkê mi kişt. Di de zî eştî zere. Wa no zulm biqedîyo. Tu heqêkê înan ê girewtişê Velîyî çin bi.”

Encu, ard ziwan ke ganî rayapêroyî bêveng mevindo û vat, “Êdî ez zî nêzana ez do seba kamcînî xemgîn biba. Êdî ez nêeşkena wina dewam bikera. Wa domanê mi bêrê verdayene. Domanê Velî vizêrî ra nata vanê, ‘pîyê ma kotî yo’. Ganî kesê wayîrê wijdanî vera nê zulmî bêveng nêvindê.”