Dayîkanê Haştîye seba ke vengdayîşê ''Haştîye û Komelê Demokratîkî'' yê Rayber Apoyî aşmêke xo dima verdaye û hema zî îqtîdarî gama pête nêeşta, nêrazîbîyayîş mojna. Dayîkanê Haştîye ke bedelê tewr giranî yê şerî dayî û bi serran o semedê înşakerdişê haştîye xîret kenê, ANFyî rê qisey kerd.

Dayîkan ra Zeynebe Çalihan vengdayîşê Rayber Apoyî sey vengdayîşê tarîxî name kerd û nê vatî: ''Dewlete heta nika gemêka pête nêeşte. Rayberîye veng da gerek vera nê dewlete ra vengêk  bivejo. Vanê 'wa çekan ronê' la çekî bi yew hetî nînê ronayene. Gerek wird hetî zî çekan ronê; haştîye bi yew hetî nêbena. Hetêkî ra qala haştîye kenê hetê bînî ra qeyûman ca kenê û HDKyî krîmînalîze kenê ke bi serran o semedê haştîye xîret keno.

Paştîya ma Rayber Apo ra pêt la bawerîya ma dewlete rê çîn a. Çunke ma verî zî eynî prosesî dîyî. Gerek verî tecrîdê serê Birêz Ocalanî bêro wedaritene û serbest bêro veradayene. Ma wazenê ke wa gamê zelal û pêtî bêrê eştene. Ma haştîya yewhetine nê haştîya dihetine wazenê. Sey dayîkê gerîlayan gerek dayîkê leşkeran zî semedê haştîye israr bikerê. Eke pêro dayîkî bibê yew vengê çekan yeno birnayene. Dejê ma dayîkan yew o, eke ma dayîkî bêrê têhet haştîye yena.''

Dayîkanê Haştîye ra Katîbe Gungor zî ard ziwan ke semedê prosesî qesawet kena û nê vatî: ''Ma sey dayîkan hêvîya haştîye nêkenê, çunke ma zanê ke îqtîdar semedê menfeatê xo beno ke hêna masa biqeldo. Ma sey dayîkan hazir ê la ma hema îqîtîdarî ra gamêke pozîtîfe nêdîya.  Bi serran o ma hêvî kenê ke wa haştîye bibo la ma zanê ke îqtîdar menfeatê xo dima yo.  Eke raşta vanê haştîye, wa sey gama verêne tepişteyanê nêweşan  serbest veradê. La gamê winayên nînê eştene. Coka fekê ma vajo haştîye zî zerrîya ma tersena. Dayîkî şer nêwezanê. Ma nêwezanê wa çew bimiro, ma pawenê ke îqtîdar game bierzo.''

Dayîkan ra Sabîha Bozkan zî vistvîre ke bi serran o semedê haştîya bianore xîret kenê û wina vat: ''Ma 40 serrî yo seba ke çew memiro û haştîye bêro kuçeyan de yê la ma hetê bînî ra çîyêk nêdî. Her dayîke wazena hêvîya haştîye bikero. Qijê perûne qiymetin ê, coka ma wazenê wa hinî na haştîya bibo haştîye raşte. Ma qefilyayî û wazenê hinî haştîye bivînê. Ma nê şerî ra zaf ant. Ma hetê leşkeran ra bi zorî dewanê xo ra ameyî vetene, zaf dej dî, qehr ant la ma çirey waştişê haştîye canêverda. Îqtîdar wa nê vengdyaîşê muhîmî yê Birêz Ocalanî qerbûnê vîjnayîşî mekero, wa samîmî bigîro dest; wa tecrîdê Îmraliyî bêro wedaretene, wa tepişteyê nêweşî serbest bêrê veradayene.''

Dayîkanê Haştîye ra Cemile Karakaş zî ard ziwan ke vengdayîşê Rayber Apoyî semedê înan hêvî afirnaye la rîyê pratîkanê verênan ra bawerîya înan îqtîdarî rê çîn a. Karakaşe  nê vatî: ''Eke gamêka pozîtîfe yena eştene wa zîndanan ra dest pê bikerê. Qijê ma her roje yenê destbendkerdene, erzîyenê zîndanan. Teber de ciwanê ma nêmendî. Ma wazenê Birêz Ocalan wa cade bibo azad. Lajêkê mi bi serran o zîndan de yo, ez wazena biresê ey. Ez hêvî kena hêvîya ma reyna nêşikîyena û haştîye raşta yena.''