Bi hezaran cinîyê ke emrê qijî de yenê zewicnayene, rastê xeylê zehmetîyan yenê. Delale Ozkan zî yew nê cinîyan ra ya û seba restoranêkî nanê tandirî virazena û debarê keyeyê xo wina kena.  

Delale  binê germî de bi saetan vindene. Delale qala hîkayeya xo kerde.

Delale hema qij bîya, pîyê xo vindî kerda, dayîka aye zî bi zor bi kesêkê bînî reyde dîya zewijnayene. Delale bi serran o dayîka xo nêvînena. Heta 14 serre verê bapîrê xo de manena û dima ra bi lez û bez yena zewijnayene û serra xo ya 15. de bena dadîye.

Delale dayîka 8 domanan a û wina vana "Mêrdeyê mi çend serrî verê cû merd. Wexto ke mêrdeyê mi, sax bi zî ez xebitîyayêne. Mi çape kerdêne, peme arêdayîne, mi berardişê destan viraştêne û rotêne. 6 mengan de şaredarî de xebitîyaya. Mi sebze û meyweyî rotî. Karê nika zî zehmet o la ez mecbûr a bikerî. Eke domanê mi bixebitîyayêne, ez o nêameyîne tîya. Kar çin o ke domanê mi bixebitê. 5 domanê mi yê emrê xebate estê. Ez çuwalêk ardan 130 TLyî ra hêrînena. Çend rey nan virazena, qedîyeno. Her çi va yo. Krîz esto. Debar zehmet o."

Delale vat, a bi serran o bênasname ciwîyaya,  4 domanan ra dima  nasname vetı û wina va: "Pîyê mi merdbi û mi nêzanayêne dayîka mi ça de ya. Coka nasnameyê mi zî nêvetêne. Ez seba nasnameyî şîya mehkeme, vat ke ganî keyeyî ra yew bêro. Çar domanan ra dima mi nasnameyê xo vet. Ez nika seba xo û domananê xo cuyêka baş wazena. Seba domananê xo kar wazena."