Partîya Demokrasîyî û Têdûştîye yê Şaran (DEM Partî)  semedê nasdayîşê  namzedanê xo yê cinîyan ê şaredarîye  yê semedê weçînayîşê cayîyî yê 31ê adare  Amed de aktîvîteya nasdayîşî organîze kerde.

Pîya bi Hemsereka Pêroyî ya DEM Partî Tulaye Hatimogullari û Hemsereka Pêroyî ya DBPyî Çîgdeme Kiliçgun Uçar xeylêk kesî tewrê ci bîyî. Heyeta aktîvîte de pankartê sey "Dema jinan vîna jinan" û "Demê cinîyan îradeyê cınîyan" ameyî daliqnayene. Reyna bi 11 ziwanan pankartanê "Jin jiyan azadî" zî aktîvîte de cayê xo girewt.

Prgoramî bi rêzgirewtişî dest pêkerd û dima ra Vervatoxa Meclîsê Cinîyan ê DEM Partî Halide Turkoglu qisey kerd. Turkoglu nê vatî: ''Sîstemê hemserekîye têna semedê cinîyan nîyo, feydeyê ci camêrdan rê zî est o. Zîhnîyetê camêrdê serdestî ewro xo sey qeyûmî mojneno ra. Sîstemê hemserekîye semedê heme cinîyan ê dinya yo. Ma sey temsîlkaranê ameyoxî do çirey nê cameverdê. Hemserekîye xeta ma ya mor a. Sebebê têkoşînê ma ya. Ê çend hêriş kenê wa bikerê, ma do xover bidê. Namzeda ma ya Sêrtî seba ke ameye destbendkerdene ewro tîya de nîya. Ne rojmegerîye sûc a ne zî hemserekîye.

Ma do 31ê adare ra dima sere de waranê komelkî û sîyasî de reyna xetanê têkoşînî xo ronê. Ma do verî qeyûman bişawê. Înan merkezê cinîyan qefilnayî, ma do reyna abikerê. Ma do kooperatîfanê xo newera abikerê, projeyanê xo yê citkarî newera bîyarê caardene. Ma do waranê ziwan, kultur û hunerî de îradeyê xo ramojnê gamanê girdan bierzê. Rîyê qeyûman ra Amed de vera cinîyan şîdet zêdîya. Qeyûmanê ke dezgehê cinîyan qefilnayî sebebê qetilkerdişê cinîyan ê. Şima do hesab bidê. Semedê pakkerdişê kuçeyan ganî zîhnîyetê qeyûman bêro gezikerdene.

Ma embazanê xo xoverdayoxanê zîndanan ra hêz genê. Inkey semedê wedaritişê tecrîdê serê Birêz Abdullah Ocalanî û ameyîşê haştîye grevê vêşanîye de yê. Ma zî bi îdîaya muntişê cuye newî rayra şinê. Beno ma ma bedel bidê la bêbedelî cuye nêbena. Ma polîtîkaya rayîrê hîrêyinî anê ca. Ma heme delegasyonî selam kenê. Berpirsîyarîya namzedanê ma pîl a. Ez înan rê serkewtiş wazena.''

Badê qiseykerdişî pêramotişê sînevîzyon ame kerdene. Aktîvîte de muzîkê weçînitişî yê cinîyan ê DEM Partî ame nasdayene.