DEM Partî Anqara de otêle de beyannameyê  weçînayîşî yê cinîyan eşkera kerd. Hemserekê cinîyî zî tede  xeylêk cinîyî bi kincanê xo yê tradîsyonelan tewrê bernameyî bîyî.

Bername de Hemsereka Pêroyî ya DEM Partî Tulaye Hatîmogullari qisey kerd û da zanayene ke weçînayîşanê herêmîyan de  vera sîstemê serdestîya camêrdan DEM Partî sîstemê şaredarîye yê ekolojîk, azadîgîrê cinîyan û demokratîkî pêşkêş bikera. Tulaye Hatîmogullari îfade kerd ke mîyanê pêro partîyan de teyna DEM Partî temsîlîya têdûşte û sîstemê hemserekîye ana ca.

Qiseykerdişî ra dima Vervatoxa Meclîsê Cinîyan ê DEM Partî Halîde Turkoglu beyanname wend. Bername de derheqê sîyasetmesara tepişte Gultane Kişanak de sînevîzyonêk ame mojnayene. Hemserekanê cinîyan pîya fotograf girewt. Bername de tim sloganê 'Jin, Jiyan, Azadî' ame vatene.

Beyannameyê bi sernameyê 'Ma do bi îradeyê cinîyan demokrasîyê herêmîyî awan bikerê' wina yo:

''-Ma do Heyetanê Cinîyan awan bikerê û pîya meseleyanê xo bi destek û rêxistinîya xo çareser bikerê.

-Ma do bi sîstemê hemserekîye ancî her ca de îradeyê cinîyan bihêz bikerê, cinîyan tewrê pêro xebatan û îdareyanê herêmîyan bikerê. 

-Ma do bi krîterê temsîlkarîya têdûşt û fermuarî şaredarî û meclîsanê şaristanan de lîsteyan de hûmara cinî û camêrdan seyci bikerê. 

-Ma do îdareyanê herêmîyan de têkoşîn, paştdayîş û hemkarîya cinîyan aver berê. 

-Ma do bikerê ke pêro cinîyî tewrê mekanîzmaya qerargirewtişî bibê. 

-Ma do seba cinîyan merkezanê perwerdeyê bi ziwanê dayîke, planê mîmarî û koordînasyonê afetî awan bikerê. 

-Ma şaredarîyan de Serekîya Dayîreyê Polîtîkayanê Cinîyan, Masaya Cinîyan, Heyetê Cinîyan, Mudirîya Polîtîkayanê Cinîyan awan kerdbî û nînan de yewinê vera şîdetî, kooperatîfê cinîyan û merkezê cinîyan awan kerdbî. Ma do nînan xurtêr bikerê.

-Ma do anxî Meclîsanê Cinîyan ê Şaredarîyan û Komîsyonanê Têdûştîya Cinî û Camêrdan awan bikerê.

-Ma do peymananê pêroyîyan ê îdareyanê herêmîyan de ancî xebatkaranê ke cinîyan rê şîdet kenê ceza bikerê. 

-Ma do seba ke keda cinîyan nêra werdene polîtîkayan biafernê, cinîyan rê xizmetê kreşanê umûmîye, merkezanê miqatbîyayîşê nêweş, kokim û astengdaran awan bidê. 

-Ma qerardar ê ke şaredarîyanê xo destê qeyûman ra bigêrê û bi modelê ekolojîk, demokratîk û azadîgîrê cinîyan têkoşînê xo bikerê çimeyê îlhamî.

-Ma do qetî sîstemê hemserekîye-hemşaredarîye ra fek vera nêdê. 

-Ma do dibistananê sîyasetî yê cinîyan xurtêr bijerê. 

-Ma do şaredarîyanê xo de budçeya cinîyan bidê kişte.

-Ma do vera polîtîkayanê asîmîlasyonî keyeyanê kulturî, dengbêjan û cinîyan awan bikerê.

-Ma do festîvalanê kultur û hunerî yê cinîyan bikerê. 

-Ma do vera polîtîkayanê seksîstan bi xorinî têkoşîn bikerê.

-Ma do projeyanê 'bostananê cinîyan û fekê berî' ancî bîyarê ca. 

-Ma do bazaranê moran û cinîyan awan bikerê. 

-Ma do şaredarîyanê xo de JINKART aktîf bikerê. 

-Ma do herêmanê pîlotan de seba ke cinîyî bêpere û bi rehetî biresê îhtîyacanê xo PED-MATÎKan awan bikerê. 

-Ma do seba cinîyan ê ciwanan merkezanê bêpereyan, wargehanê asayîyan awan bikerê û hetkarîya madîye bidê înan.  Ma do bursan bidê cinîyan ê ciwanan.

-Ma do vera şîdetê serê cinîyan biqedînê. Na çarçewe de ma do destkewteyanê sey CEDAW, Deklarasyonê Pekînî û Peymana Îstanbulî bîyarê ca.

-Ma do seba cinîyan keyeyanê bextwaştişî awan bikerê, hetkarîya psîkolojîke û huqûqî bidê mexdûranê şîdetî. 

-Ma do vera cîyakerîyanê serê endamanê LGBTÎ têkoşîn bikerê. 

-Ma do bi pirziwanan û 7-24 saetan xeta 'Alo Şîdet'î newe ra awan ronê. 

-Ma do seba domananê kênayan wargehanê beleşan û xizmetê înternetî yê beleşî bidê. 

-Ma do Planê Çalakîya Afetî yê Cinîyan awan bikerê, wextê afetan de cade îhtîyacanê cinîyan peyda bikerê û cinîyan bipawê.

-Ma do seba cinîyan û kênayan ê astengdaran merkezan awan bikerê.

-Ma do seba pêro meseleyanê cinîyan Yewinanê Têdûştîye awan bikerê. 

-Ma do tim vajê 'xizmetê weşîye yê bi ziwanê dayîke heq o.'

-Ma do şaredarîyanê xo de yewinanê weşîye awan bikerê û seba cinîyan projeyanê taybetan bikerê. Ma do ancî merkezê weşîye yê cinîyan awan bikerê.

-Ma do yewinanê ekolojî awan bikerê. 

-Ma do dew û şaristananê xo bikerê ekolojîkî. 

-Ma do ancî verê pêro polîtîkayanê şîdet û şerî de  vinderê.

-Ma do seba cinîyan ê multecîyan waran awan bikerê û meseleyanê înan çareser bikerê.

-Ma do seba cinîyan ê multecîyan keyeyanê bextwaştişî û merkezanê têkoşînê vera şîdetî awan bikerê.''