Serdozgerîya Amedî  vengdayîşê Meclîsê Ciwanan ê HDPyî yê vera vîrusê Korona sey bahane mojna û derheqê Wekîla HDPyî Remzîye Tosun de tehqîqatêk da destpêkerdene.

Serdozgerîye îdîa kerd ke wekîle Remzîye Tosun yewî reyde kuçeyanê Amedî de gêraya û aye kuçeyan de anons kerdo ke ''Hukmat wazeno kurdî bimirê. Coka seba şima tebdîr nêgêno.'' Serdozgerîya bi sûcdarîya ''teşwîqê şarî yê seba dişmenîye û nefretî'' derheqê Remzîye Tosun de tehqîqatêk da destpêkerdene. La dîmenan de ke Remzîye Tosun medyaya komelkîye ser o pare kerdî û serdozgerîye pêşkêşê medya kerdî, yeno dîyene le keso ke anons keno nê cumleyan nêvano.

Dîmenan de nê îfadeyî yenê vatene: ''Sey Meclîsê Ciwanan ê HDPyî ma venga şima danê ke vîrusê Korona pêro dinya de vila bi û zaf kesî pa merdî. Hukmat seba şarî tebdîr nêgêno, tebdîrê ke girewtî zî qîm nêkenê û kêm ê. Coka ganî ma miqatê xo û keyeyê xo bibê. Qet meşorê teber. Destê xo pê sabunî bişuyê. Verar meşorê yewbînan, dest medê yewbînan.''

Sere de rojnameyê Sabahî zaf dezgehê medyaya îqtîdarî Remzîye Tosun sey hedefe mojna.