Komeleya Freude Helfen Freunden/Dostî Hetê Dostan Kenê ya ke seba hetkarî bido kesanê ke erdlerzê serra 2011’î yê Wanî Almanya de amîbî ronayene bi projeyê xo yê “berhemardişê nane yowxeyî” 15 cinîyan ê Dêrsimijan rê îmkanê karî da.

Ayşegul Arase (60) ya Dêrsimije ya ke Almanya de ciwîyena sereka Komeleya Freude Helfen Freunden/Dostî Hetê Dostan Kenê ya. Arase dimayo ke ferq kerd ke wareyê aye de problemanê tewr pîlan ra yew zî bêkarîya cinîyan Komeleya Dostê Hetê Dostan Kenê rê projeyê “berhemardişê nane yowxeyî” pêşkêş kerd. Proje ame qebûlkerdene. Goreyê projeyî do cinîyî kîşta viraştişê nane yowxeyî de wer bipewjê û kargehî sey kafe zî bişuxulnê.  

Kargeho ke nameyê ci Zembûr o û do 15 cinîyan rê îmkanê karî bido, dimayê qedînayîşê kemasîyan do 1’ê Hezîrane de bêro akerdene. Nê kargehî de do cinîyê ke bi Qerarnameyê Hukmê Qanûnî (KHK) gure ra erzîyayê bixebetîyê.

Arase ard ziwan ke cinîyê ke do nê kargehî de bixebetîyê hem wayîrê kargehî yê hem zî berhemdarê ci yê û vat, “Amacê ma yo sereke, cinîyan ê Dêrsimjan rê îmkanê karî dayîş o. Çi çîyo ke cinîyî serkêşîya ci kenê, ez pê zaf şa bena. No proje projeyêko sosyal o. Tîya patron û karkerêk çino. Ameyeyo ke do bêro desfînayene do bidîyo ê cinîyan.”

Şêwirmenda projeyî Yildiz Gunduze vat kargehê înan kafeyêk ra wetêr cugehêk o. Mamosteye Şukran Yalçina ke bi KHK gure ra erzîyabî vat, “Cinîyî her wareyê cuye de berheman danê. Amacê proje yo bingeyên, merkezê ci de estbîyayîşê cinîyan o. Amacê ma mekanê xo de serdestkerdişê ziwan û rengê cinî yo.”