Şehîdê Qirkerdişê Parisî yê 9ê çeleyê 2013î Sakîne Cansiz, Fîdane Dogan û Leyla Şaylemez Dêrsim de serkêşîya DEM Partî de ameyî yadkerdene.

Wekîla DEM Partî ya Dêrsimî Aytene Kordu yadkerdiş de  vat: ''Keda embaze Sakîne ra no têkoşîn resayo nê rojan. Embaze Sakîne tim vatêne 'cuya mi tim bi têkoşînî derbaz bîye.' Aye verê ma roşnî kerd.''

Wekîla DEM Partî ya Wanî Gulcane Kaçmaz Sayyîgît vat: ''Vera cinîyan ê kurdan şerêko taybet yeno kerdene. Eqlê dewlete wazeno ke wa Qirkerdişê Parisî tarî bimano. Ma do ney binê tarîtîye de nêverdê û têkoşînê înan rê dewam bikerê.''

Vervatoxa Meclîsê Cinîyan ê DBPyî Bêrîvane Bahçecî yadkerdiş de vat: ''Feraseto ke Qirkerdişê Parisî kerdo, dewre de yo. Embazê ma Nagîhan Akarsel, Hero Bahaddîn, Gulistan Tara zî qestî ra ameyî qetilkerdene. Ma do ala înan bikirişê û têkoşînê Sakîne Cansiz rê dewam bikerê.''

Yadkerdişî ra dima girseyî pîya gorê Sakîne Cansiz zîyaret kerd.