Endamanê Platformê Cinîyan ê Dêrsimî semedo ke mîyanê 24 saetan de 4 cinîyê bi nameyê Aylîne Sozer, Vesîle Sonmez, Selda Taş û Betule Tuglak hetê camêrdan ra  ameyî qetilkerdene Meydanê Seyîd Rizayî de eşkerayîyêke daye.

Cinîyan pankarta bi nuşteyê 'Seba ke ma nêrijîyê do birijnê' akerde. Nameyê platformî ser o Avûkate Çagla Yolaşan eşkerayîye wende.

Eşkerayîye de ame parekerdene ke semedo ke îqtîdar qirkerdişê cinîyan peygoş keno û bêceza verdeno serebûtê winasênî her roje zêdîyenê. Yolaşane ard ziwan ke ganî cade Peymana Îstanbulî bêra caardene.

Yolaşane vat: ''Nê welatî de cinîyî her roje keyeyê xo de yenê vêşnayene.Seba ke cuya azad, têdûşte bêra caardene, cinîyî maruzê şîdetî nêmanê û biasayîş bibê ma do têkoşînê xo war nêverdê. Ma do nê sîstemo ke cinîyî her roje tede vêşenê qebul nêkenê. Seba ke ma nêrijîyê ma do nê sîstemî birijnê.''