Wendekara Zanîngehê Munzurî Gulîstane Doku 5ê çeleyê 2020î ra nata 650 rojî yo vînîbîyaye ya. Tehqîqatê serebûtî dewam keno la vergumanê dosya Zainal Abarakov û babîyê Engîn Yucelo ke polîs o serbest ê.

Wextê tehqîqatî de Engîn Yucelî çapemenîye rê agahîyê şexsî yê Gulîstane Doku pare kerdbi coka derheqê ci de dewa amebî akerdene. Roniştişê 4. yo dewa Mehkemeya Cezaya Girane ya  Dêrsimî de ame kerdene. Verguman Engîn Yucel tewrê roniştişî nêbi. Avûkatê Gulîstane Doku Alî Çîmen û Fatma Kalsen dewa de amade bîyî.

Engîn Yucelo ke 4 roniştişan ra nata tewrê dewa nêbeno derheqê ci de bira tepiştişî dîyaye. Avûkat Alî Çîmenî roniştişî ra dima eşkerayîye daye û vist vîrî ke Yucelî agahîyê şexsî yê Gulîstane pê nasnameyê xo yê karmendîye vistî destî, pare kerdî û vat: ''Na dewa nê sûcî ser o ya. Çarçewa nê tehqîqatî de dest nîya wezîfeyê karmendîye yê Yucelî ser. Yucel tewrê roniştişan nêbi beno ke remayo. Coka derheqê ci de bira tepiştişî dîyaye.''