Meclîsê Cinîyan ê Rojawanî vizêr Qamişlo de derheqê binpaykerdişanê heqanê merdiman de ke dewleta tirke herêmanê îşxalkerdeyan de vera cinîyan kena, komxebatêke ameye kerdene.

Temsîlkarê Yewîya Cinîyan ê Sûryanan, Meclîsê Cinîyan ê Rojawanî, buroyê Cinîyan ê Partîya Newebîyayîşî, Buroyê Cinîyan ê TEV-DEMî, Rêxistina Heqanê Merdiman, Dayîreyê Têkilîyanê Teberî, Temsîlkarîya Îdareyê Xoserî ya Başûrê Kurdîstanî, Buroyê Cinîyan ê MSDyî, Komîteya Cinîyan a Kantonê Qamişloyî, Meclîsê Cinîyan ê Sûrîye, Dezgehê Êzidîyan, Rêxistina Pêlî, Kongreya Starî, Partîya Ameyoxî ya Sûrîye û temsîlkarê partîyan ê sîyasîyan tewrê komxebate bîyî.

Endama Koordînasyonê Kongreya Starî Sihame Emokê komxebatê de qisey kerd û vat: ''Hema zî kerdişanê dewleta tirke rê çareserîyêke nêameye peydakerdene. Tirkîya wazena Sûrîye bivurna wextê Osmanijan.''

Sekretera Partîya Ameyoxî ya Sûrîye Sihame Dawûd vat: ''Terorê dewleta tirke yê vera cinîyan dewam keno; her roje cinîyî kişîyenê, yenê remnayene, înan rê tacîz û tecawuzî yenê kerdene. Dewleta tirke wazena îradeyê cinîyan bişikna. ''

Sereka Buroyê Cigêrayîşan ê Huqûqîtan ê Smartî Amrîne Xelîfe vat: ''Ganî heqê cinî û domanan bêrê pawtene. Nêbeno ke komê çekdarî hêrişê sivîlan bikerê.''

Beşdaran da zanayene ke qetilbîyayîşê Hevrîne Xelef pê dokumantan ame îsbatkerdene la dewleta tirke ra hesab nêame persayene. ''

Hemsereka Rêxistina Heqanê Merdiman a Herêma Cizîre Evîne Cuma vat: ''Binê îşxalê dewleta tirke de 3 serran de 53 cinîyî ameyî kiştene, 128 cinîyî ameyî birîndarkerdene û 61 cinîyî bi zaf reyan maruzê tecawuzî bîyî. Îşkence û kerdişanê xiraban ra 5 cinîyî dinyaya xo bedilnaye. 317 cinîyî ameyî remnayene û pê bedelê fîdye ameyî veradayene. Binê nameyê operasyonê 'Bariş Pinari' de Serêkanîyê, Girê Sipî û herêmanê sînorî de 23 cinîyî kişîyayîş, înan ra 2 cinîyî maruzê tecawuzî bîyî. 60 cinîyî bombardumanan de birîndar bîyî, 12 cinîyî ameyî remnayene.''

Komxebate de ame vatene ke nê kerdişê xirabî û sûcê şerî psîkolojîya cinîyan rê bi hawayêkê xirabî tesîr kenê. Beşdaranê komxebate venga dezgehan û rêxistinan da ke hetê psîkolojî, huqûq, komelkî ra paştî bêra dayene cinîyanê herême.