Rojawanê Kurdîstanî de hêrişanê dewleta tirke û cerganê ci de mabênê serranê 2019-2024î de 142 cinîyî şehîd bîyî. 

Nê cinîyan ra hîkayeyê tayênan wina yê:

Xalîde Îsa

A 28ê tebaxe de hêrişê dewleta tirke de şehîd bîye. A dadîya çar domanan bîye. Aye mîyanê Komunê Şehîd Cesûrî, Kongreya Starî de wezîfe kerd. Lajêkê aye zî gerîla yo.

Leymane Şiwêş û Yûsra Derwêş

Hemsereka Meclîsê Kantonê Qamişloyî Yûsra Derwêş û Hetkara Hemserekanê Meclîsê Kantonê Qamişloyî Leymane Şiwêş 20ê hezîrana 2023yî de, hêrişê dewleta tirke de şehîd bîyî. Leymane 1968 de Amûdê de dadîya xo ra bîya. A 2002 de hetê PDKyî ra tepişîyabî û 6 mengan zîndan de mend. A wextê hêrişanê DAÎŞî de cinîyan rê bîye serkêş. Yûsra 1972 de Amûdê de dadîya xo ra bîya. A 2022 de sey Hemsereka Meclîsê Kantonê Qamişloyî ameye weçînayene.

Jîyane, Roje û Barîne

Nê hîrê heme şerwanê YJA-Starî zî 22yê temmuza 2022yî de hêrişê dewleta tirke de şehîd bîyî. Jîyane şaristanê Efrînî ra, Roje şaristanê Dirbêsîyê ra û Barîne zî şaristanê Şehba ra bîyî. Nê hîrê şerwanan vera hêrişanê dewleta tirke bi fedakarî têkoşîn kerdêne.

Rojîne, Vîyane û Nûjîyane

25ê kanûna 2021î de dewleta  tirke ya îşxalkere di camêrd û di cinîyî qetil kerdî Rojîne nê hêrişî de birîndar bîye û 26ê kanûne de a zî şehîd bîye.

Hêbûne, Zehra û Emîne

Endama Koordînasyonê Kongreya Starî ya Kantonê Firatî, Zehra Berkel, Emîne Veysî û Endama Kongreya Starî ya Kantonê Firatî Hêbûne Mele Xelîl 23yê hezîrana 2020î de Kobanê de şehîd bîyî. Nê cinîyî bi têkoşînê xo yê vera DAÎŞî zî şinasîyayêne.

Dilovane Gever

Rojnamegere Dilovane 13ê teşrîna verêne ya 2019î de Girê Sipî de hêrişê dewleta tirke de şehîd bîye. 

Helîme Osmana ke nê hêrişan ra bi birindarî xelisîyaya vat ke cinîyî ganî bi îrade û qerardarî cewab bidê hêrişan. 18ê nîsana 2024î de artêşa tirke ya îşxalkere wesayîtêko sivîl Kobanê de da bombayan ver. Nê hêrişî de Helîme yew lingê xo ra bîye.

Helîme ANFyî rê qisey kerd û vat ke cinîyî bi Şorişê Rojawanî her warî de tewrê xebatan bîyê. Helîme wina dewam kerd: ''Dewleta tirke cinîyan ê serkêşan ra tersena coka tim nînan kena hedef. La ma do verê nê hêrişan de qetî sereyê xo nêarê war. Dewleta tirke bi hêrişanê xo do nêeşka îrade, qerardarî û moralê cinîyan biherimna. Ma do vera nê hêrişan têkoşînê xo xurtêr bikerê''