Wendekara Zanîngehê Munzurî  Gulîstane Doku (21) ra 5ê çeleyî ra nata xeberêke nêna girewtene. Xebatê cigêrayîşî bênetîce mendî û tehqîqatê serebûtî nêame hîrakerdene. Derheqê vergumanê verênî Zaînal Abarakovî de zî cigêrayîşo bitesîr nêame kerdene. Rêxistinê komelê sivîlî îfade kenê ke Gulîstane ameye qetilkerdene, dewlete zî israr kena ke Gulîstane xo kişt. La Dêrsim de ke pê kamereyan yeno teqîbkerdene hema zî Gulîstane ra xeberêke çin a.

Endama Komîsyonê Seba Gulîstane Doku Edaletî Dîlare Aras  derheqê serebûtî de nê çîyî ardî ziwan: ''Îhtîmalê kişîyayîşê Gulîstane ser o nêro vindertene. Zaînal vergumano verêne bi la şaristanî nişa ra terikna. Ma wazenê ke tehqîqat bi hawayêkê zelalî bêro kerdene û rayaumûmîye rê zanayîş bêro dayene. Heta ke ma aqîbetê Gulîstane bizanê ma donê serebûtî teqîb bikerê. Esma Kiliçarslan bi hawayêkê tesadufîyî ameye dîyene. No polîtîkaya dewlete mojneno. Serê nê serebûtî ra 100 serrî zî derbaz bibê ma do aqîbetê Gulîstane bipersê.''

Hemsereka HDPyî ya Dêrsimî Nurşate Yeşîl zî da zanayene ke vînbîyayîşê Gulîstane serebûtêko tabî nîyo û vat: ''No serebutêkê xokiştişî nîyo. Hêzê leşkerî yê dewlete û mamostayê zanîngehî zî daxîlê nê serebûtî bîyî. Nê pêro netîceyê polîtîkayan ê taybetan ê dewlete yê. Eke no serebûtêkê xokiştişî zî bibo ganî bêro cigêrayene. No yew cînayet o. Eke ma sey cinîyan bibê yew ma eşkenê heqê nê serebûtî ra berê.'' 

Îdarekara Partîya Kede (EMEP) ya Dêrsimî Serpîle Berk zî derheqê babete de qisey kerd û vat: ''Îfadeyê Zaînal Abarakov  nêame girewtene, şaristan terk kerd. Dewlete wazena ke ma têna bifikîrê ke Gulîstane xo kişt. Cayo ke Gulîstan tewr peyêne uja de dîyaye hîrê kamerayî estbî la ame vatene ke 2 kamerayî xeripîyaye yê. Roja peyêne Gulîstane Zaînal reyde ameye têhet. La no daxîlê tehqîqatî nêame kerdene.''

Temsîlkara Cinîya Demokareta Newîye Sevcane Topal zî eşkera kerd ke îfadeyê Zaînal Abarakovî keye de ame girewtene ke babîyê ci polîs o û Zaînal erşawîya şaristanêkê bînî. Sevcane pare kerd ke nê pêro delîl ê. Sevcane Topal vat: ''Yeno waştene ke serebût bêro mîyankerdene û rojdemî ra bêro vetene. Wexto ke xebatê cigêrayîşî yê seba Gulîstane Doku dewam kerdêne  meyîtê Esma Kiliçarslan ame dîyene. Cinîyê ke ameyî vînkerdene serewedaritişê ma yê.''