Dimayê serranê dergan peyser agêraye dewa xo

Sureyya Sezgîna ke 40 serre verê cû dewa Zaxgerî ya Tercanî  ya Erzînganî ra şîya metroloan û teberê welatî de ciwîyaye, agêraye dewa xo û veng dana ke êyê ke dewa xo ra bar kerd, abigêrê dewanê xo.

Sureyya Sezgîna ke 40 serre verê cû dewa Zaxgerî ya Tercanî  ya Erzînganî ra şîya metroloan û teberê welatî de ciwîyaye, agêraye dewa xo û veng dana ke êyê ke dewa xo ra bar kerd, abigêrê dewanê xo.

Sezgîna ke bi serran şaristananê pîlan û teberê welatî de ciwîyaye, dimayê hende serran agêraye dewa xo ke tim bêrîya ci kerdêne. Wexto ke Sezgîne agêraye dewa xo dî ke dewe de kes nêmendo, herkes bar kerdo, Sezgîne awil zaf kewtêne verê naye zî cuya dewe û rindekîyê xozayî dejê aye şenik kenê.

Sezgîne cuya xo ra wina behs kena: "Ez dewe de zewijîyaye şîya Stenbol, Stenbol ra zî şîya teberê welatî. Dima ez teberê welatî ra agêraye şîya Îzmîr de menda. Hînî cuya şaristanî mi rê zaf zor yeno, ma mecbur agêrayê dewa xo. Qijkekîya mi tîya derbas bîye, mi zaf bêrîya dewa xo kerdêne. Ez nika têna tîya ciwîyena, ge ge domanê mi yenê hetê mi, ê zî dewe ra hes kenê. Nika dewe de kesêk nêmendo, tayê înan bar kerd, tayê înan zî merdî."

Sezgîna ke dimayê agêrayîşê dewe dest pê amadekarîya zimistanî kerde, seba zimistanî berardişanê sey aqît, sîrke, rîçal, bastêq, meyweyanê huşkan amade kena. Sezgîne ard ziwan ke dewa aye de Laz, Kurdî û Tirkî pîya ciwîyenê û a rayîrê Elewîtîye ca nêverdena. Dewa ma de her kes bi ziwanê xo qisey keno, çew qarişê çewî nêbeno. Ma bawerîya xo anê ca. Ma mumanê xo visnenê ta. Rayberê ma, pîrê ma nênê la ma reyna zî bawerîya xo anê ca. Pîrê mayê ke tîya de ciwîyayêne, merdî, ciwanê ma înan nas nêkenî. La şaristanan de keyeyê cemî estî, ma uca de bawerîye xo anê ca. Dewa xo ca meverdê, meşorê. Abigêrê. Tîya de hewa û awe pak a. Ma jîyargeyê xo, erdê dadî û pîranê xo ca meverdê. Ciwanî wa abigêrê. Şaristan de cuye çin a."