Wekîlê DEM Partî yê Amedî Serhat Erenî derheqê tecrîdê Îmraliyî de ajansê ma rê qisey kerd.

Serhat Erenî îfade kerd ke ganî standartê huqûqî yê mîyanneteweyîy seba azadîya Rayber Apoyî bêrê caardene. Erenî vist vîrî ke Rayber Apo hetê kurdan ra û hetê dinya ra sey îradeyêkî yeno qebulkerdene. 

Erenî vat: ''Azadîya Ocalanî seba prosesêkê bitesîr û zixmî astêka krîtîke de ya. Nîqaşanê serê çareserîye ra zafêr û wetêr ganî azadîya Birêz Ocalanî bêra caardene. Gama verêne ganî caardişê krîteranê mîyanneteweyîyan biba. Ganî tecrîdê Îmraliyî bêro wedaritene û pêvînayîşê bi Ocalanî nêrê astengkerdene. Oyo diyîn zî ganî çarçewa 'heqê hêvîye' de verê roşnîya biranê MHME û Komîteya Wezîran a Konseya Ewropa de azadîye bêra caardene.''

Erenî dîyar kerd ke Rayber Apoyî bi zelalî vato 'Ez wayîrê ê hêzê teorîk û pratîkî ya ke eşkena nê prosesê şer û pêkewtişî bivurna zemînêkê sîyasî û huqûqî.'  Erenî vat ke prosesê 2013-2015î de samîmîyet û tesîrê Rayber Apoyî ameybî îsbatkerene.

Erenî ard ziwan ke meseleya kurdan bingeyê pêro krîzan de ya û ganî hinî bêra çareserkerdene. Erenî da zanayene ke Rayber Apo seba çareserîye aktoro tewr sereke yo. Erenî vat: ''Tesbîtê Birêz Ocalanî seba haştîya herême girîng o. Birêz Ocalan seba prosesî amade yo la dewlete û sîyaset wina nêasenê.''

Erenî wina dewam kerd: ''Bêguman her serebûto nikayên bi tarîxî de eleqedar o. Hêrişê vera Rojawanî û qirkerdişan ameyoxê pêro kurdan visneno binê tehlukeyî. Caardişê pêşnîyazê Birêz Ocalanî seba dîyalog û çareserîye, beno ke firsendo tewr pîl o.''