Endama Koordînasyonê KJKyî Besê Erzîncan beşê diyînî yê roportajî de tesîrê şerê hegemonîkî yê serê cinîyan û rayîrê têkoşînê vera nê şerî ercnayî.

Qiseykerdişê Erzîncane ra beşêk wina yo:

''Şerê Rûsya-Ukrayna bi zelalî mojna ke camêrdanê hegemonîkan dinya arda kamyew aste. No şer şerê hêzanê hegemonîkan o. Şerê welatanê Amerîka-Ewropa-Rûsya şerê serwerî û îqtîdarî yê. Amerîka û Ewropa Rojhelatê Mîyanênî de vera şer, parçebîyayîş, koçberî, remnayîş û tecawuzê cinîyan bêveng mendî la şerê Ukrayna de vera Rûsya ambargoyanê pîlan kenê. Ma sey hêzanê azadîpawitoxan, raştî û bêedaletîya îqtîdaran hol zanenê. Ganî merdimî nê şerê Rûsya-Ukrayna ra dersan bigêrê.

Nê esasî ser o vera polîtîkayanê şerî yê netewe-dewlete bi taybetî vera NATOyî ganî cinîyî û merdimîye asta dinya de têgêrayîşêkê haştîye bi rêxistin bikerê. Tîya de ganî merdimî xo nêdê hetê Ukrayna yan zî hetê Rûsya. Ganî merdimî vera hişmendîya talanker, îşxalkere, şerwaz û kolonyalîste yê sîstemê globalî wurzê payan ser.

Modelê netewe-dewlete koçberîye û kolekerdişî merdiman rê ferz kenê. Coka nê şerî de hetê ma cinîyan hetê azadîya şar û cinîyan o. Wayîrvejîyayîşê şarê Ukrayna bi vervejîyayîşê vera modelê netewe-dewlete beno. Cinîyî, kedkar û hêzê demokrasî û azadîye yê wird welayan ganî vera nê sîstemî têbigêrê. Têgêrayîşê cinîyan ê dinya her ca de vera sîstemê serdestîya camêrdan xoverdayîşê xo rê dewam kenê. Mîsal, Afganîstan de cinîyî vera Talîbanî çalakîyan de yê. No zî mojneno ke ê senî pabesteyê azadîye yê. 

Cinîyî bi awankerdişê sîstem û îdareyê xo eşkenê xo biresnê azadîya raştikêne. No sîstem seba ke têkoşînê azadîya cinîyan çin bikero û potansîyelê ci bixeniqno, emrê xo derg bikero gêreno stratejî û taktîkanê cîyayan. Xeylêk dezgehanê dewlete de cinîyî ameyî cakerdene. Bi nê hawayî têkoşînê cinîyan mîyanê sîstemê dewlete de verdenê. La cinîyê azadî na polîtîka fam kenê û vera ci têkoşîn kenê.

Cinîyî mîyanê dezgehanê dewlete de nê la teberê dewlete de bi awankerdişê îdare û sîstemê xo azad biciwîyê. Bi caardişê konfederalîzmê cinîyan ê demokratîk cinîyî eşkenê her ca de ser bikerê. Ganî cinîyî têkilîya xo ya bi dewlete bi temamî biqerifnê û sîstemê xo awan bikerê. Sey cinîyan ê kurdan awankerdişê xoîdareyî de ganî ma rayberîye bikerê.''