Endama Koordînasyonê KJKyî Besê Erzîncan derheqê 8ê Adare Roja Cinîyan ê Kedkaran a Dinya, Têgêrayîşê Cinîyan ê Kurdan û têkoşînê cinîyan de ANFyî rê qisey kerd.

Qiseykerdişê Besê Erzîncan ra beşêk wina yo:

''Têgêrayîşê Cinîyan ê Kurdan hetê îdeolojîkî ra xurt o mesele hînî têna destvistişê heqanê cinîyan nîyo. Nînan reyde ganî waranê xopawitiş, sîyasey, sosyal, ekonomî, kultur, huqûq û çapemenîye de cuye newe ra bêra afernayene. Hînî dinya de her ca warê şorişî yo û yewîya cinîyan stratejîya tewr girîng a.

Çalakîyanê 8ê Adare de cinîyê kurdî pê ruhê serfîrazî, pê sondê azadîye û pê moral û hêzî vejîyayî kuçe û meydanan. Nê çalakîyan mojna ke serra 2021î de têkoşîn do senî biqewimîyo. Raştîya cinîyan ê azadan a ke Rayberê ma vete werte ewro rayberîya têkoşînê azadîye yê cinîyan kena. 8ê Adare de cinîyan ê kurdan pê hêrs û kînî tecrîdê vera Rayberîye şermezar kerd. Xoverdayîşê cinîyan do tecrîdê vera Rayberîye bişikno.

Dewlet û îqtîdarê tirkî vera cinîyan ê kurdan her tewir hêriş kenê, polîtîkayanê gemarinan anê ca.  Cinîyî vera nê kerdişan ganî xo bipawê û rêxistinîya xo geş bikerê. Xopawitiş seba ke cinîyî bieşkê hetê fîzîkî û psîkolojîkî ra xo bipawê. Cinîyê ke wayîrê xopawitişî nîyê nêeşkenê sîstemê modernîteya kapîtalîste bipawê.

Eke cinîyî bi hawayêkê radîkalî têkoşîn bikerê qetî do ser bikewê. Têgêrayîşê cinîyan ganî pê bernameyanê rêxistinkerdişî xo pratîk bikerê. Cinîyî ganî vera sîstemê serdestîya camêrdan alternatîfê xo ronê û têkoşîn bikerê. Şorişê Rojawanî seba têgêrayîşan ê cinîyan ê dinya bi mîsalêko pîl. Seba cinîyan bi hêvî û bawerî.

Jineolojî pê geşbîyayîşê têgêrayîşê azadîye yê cinîyan, pê şorişê merdimîye pê rolêkê stratejîkî têgêrena. Cinîyî pê jineolohî şîyar benê, îdare kenê û raştîye vejenê werte. Cinîyî do pê çalakîyan û rêxistinîya jineolojî bi hawayêkê xurtêrî têkoşîn bikerê.

Modernîteya kapîtalîste zêdêr cinî û ciwanan kena hedef. Mîyanê komelî de tewr zaf keda cinîyan yena binpaykerdene, îradeyê  doman û cinîyan yeno şiknayene. Coka ganî cinî û ciwanî pîya têkoşîn bikerê. Têkoşînê ma waranê cuye yê alternatîfan awan keno. Cinî û ciwanî wa nê waran de têkoşînê xo geş bikerê.

Îdeolojîya azadîya cinîyan, manîfesto û perspektîfê şorişê cinîyan zanîyenê. Rayberîya ma pê rayberîya cinîyan têkoşînêk aferna. Ma sey Têgêrayîşê Azadîye yê Cinîyan ê Kurdîstanî hetê îdeolojîkî ra zend û bendê xo nayî ro. Tez û perspektîfê Rayberîya ma yê serê cinîyan keyfê cinîyanê dinya anê.

Neteweya demokratîke, konfederalîzmp demokratîk, rayberîya cinîyan de aver şinê. Hînî mesele têna destvistişê heqan nîyo. Nînan reyde ganî warê xopawitiş, sîyaset, sosyal, ekonomî, leşkerî û sîyasî yê cinîyan newe ra bêrê afernayene.

Asta rêxistinîya ma ya komelkî, xoverdayoxîya ma ya vera sîstemê serdestî yê camêrdan, asta ma ya îdeolojîke, sîyasî û leşkerî  mîsyonê ma yê rayberîya cinîyanê dinya geş kerd. Cinîyê Rojawanî pêro dinya rê bîyî model, sîstemê hemserekîye her ke şino geş bena. Cinîyê erebî her ke îdeolojîya Rayberîye şinasnenê nêzdîyê têgêrayîşê ma benê, têgêrayîşê ma bi giranî tesîrê cinîyan ê farsan zî keno.

Rojawan de cinîyê kurdî seba awankerdişê Rojhelatê Mîyanênî yê demokratîkî rolêkê pîlî kay kenê. Qet yew hêz nêeşkeno têkoşînê azadîya cinîyan ê Rojhelatê Kurdîstanî asteng bikero. Başûrê Kurdîstanî de şorişo raştikên pê têkoşînê demokrasî yê cinîyan geş beno. Azadîya cinîyanê Şingalî Fermanê 73. ra dima geş bîye. Îdareyo Xoser ê Şingalî do pê xoverdayîşê cinîyan bibo fermî.

Senî ke xoverdayîşê warê komelkî gerîlayan rê beno hêz, xoverdayîşê gerîlayan zî cinîyan rê beno hêz û moral. Gerîlayî koyan, deştan, zîndanan, keyeyan û teberê welatî de hêzêkê pîlî danê merdimanê ma. Ê hêzê demokrasî û azadîye yê.''