Weçînitişê roja Yewşemeyî de ke do 20 parlamenterî seba Yewîya Ewropa biameyêne weçînitene, SAP’î se ra 23,6 rayî girewtî û Încîre zî tede 5 parlamenterî aye ra ameyî weçînitene.

Încîre rew ra yo ke zereyê Partîya Karkeranê Demokratan a Swêdî (SAP) de sîyaset kena. Încîre demêk serekîya Yewîya Ciwananê Sosyalîstan a Mîyanneteweyîye (IÛSY) kerde û dima ra zî merkezê Olof Palmeyî de xebetîyaye. 2 serrî yo ke hetkarîya Sekreterîya Têkilîyanê Mîyanneteweyîyan a SAP’î kerdêne.

Încîre verê weçînitişan roportajêk ANF’yî dir kerdibi û vatibi, “Seba pawitişê seypêyîye, demokrasî û heqanê merdiman û seba dewaya Kurdan bîyarî rojdem, ez Parlamentoyê Ewropa rê bîya namzede.”

Încîre derheqê zextê serê merdiman ê ke Tirkîya û Kurdistan de yenê kerdene xeylî eşkerayîyî dayê û xeylî reyan serê nameyê partîya xo de tewrê roniştişanê dewayanê hemserekan û parlamenteranê HDP’yî bîya.

Tewr peynî weçînitişê herêmî yê 31’ê Adare de pîya bi parlamenterê SAP’î Kadîr Kasirgayî Amed de bîbî çimdara weçînitişan û çimdarîyê xo bi rayîrê ANF’yî rayapêroyîye dir pare kerdîbî.