Bajarê Dusseldorfî yê Almanya de hetêYJK-E ra çalakîya paştdayîşê Efrînî ameye organîzekerdene. Bajaranê cîya cîyayan ê eyaletê NRWî ra kurdîstanijî ameyî têhet û îşxalê dewelta tirke yê vera Efrînî şermezar kerd.

Verê rayraşîyayîşî Hemsereka PYDyî Eyşe Hiso bi telefonî qiseykerdişêk kerd. Hiso vat: ''Şarê Efrînî kampan de têkoşînê xo bi xoverdayîşê xurtî domneno. Ma welatî ra merdimê ma yê ke semedê Efrînî vejîyayî kuçeyan selam kenê. Dewleta tirke hîrê serrî yo wazenA ruhê Efrînî tarî bikero. La ma nayî vajê Efrîn bi estbîyayîş, xoverdayîş, cografya û nasnameyê cinîyî ganî yo. Ma sey Rojawanî hêzê xo şarê xo yê xoverdayoxî ra genê. Ma do semedê Efrînî tim payra bi. Efrîn sebebê nefesgirewtişê ma yo.''

Hemserekê KCDK-E Yuksel Koçî zî çalakîye de qisey kerd. Koçî vat: ''Wa dewleta tirke bizano ke şarê kurdî her ca de Efrînî paweno. Efrîn anorê Kurdîstanî yo, anorê merdimîye yo. Ma şerê Şehba zî selam kenê. Şima têna nîyê. Kurdîstan peyê paştê şima de yo.''

Aktîvîsta TJK-E  Besîme Konca zî vat: ''Efrîn zerrîya Kurdîstanî yo. Ma sey têgêrayîşê cinîyan şexsê şarê Efînî de şarê ma yo ke Şehba, Şingal, Girêsipî û Serêkanîyê û Vakûrê Kurdîstanî de xover dano ma înan selam kenê. Şexsê Rayber Apoyî xoverdayîşê zîndanan zî selam kenê. Ma sond wanenê ke heta ke ma qesasê cinîyan ê ke Efrîn de ameyî remnayene , kiştene û raştê tecawuzî ameyî nêgirê ma do têkoşîn rê dewam bikerê.''

Temsîlkara YJK-E Aytene Kaplane zî vat: ''Dewleta tirke sey Vakûrkê Kurdîstanî Rojawan de zî bajaran û dewan rijnena, merdimanê asîmîle kena. Perwedeyê tirkî ferz kena. Kam ke bîatê ci nêkero cirê dişmenîye kena.''