Mesuldarê Têkilîyanê Teberî yê Îdareyê Xoserîya Demokratîke yê Şingalî Faris Herboyî derheqê rewşa nikayêne ya Şingalî de Çira TVyî rê qisey kerd.

Faris Herboyî eşkerayîya Îdareyê Xoserî yê Şingalî ya 25ê adare vîste vîrî û vat: ''Pêro dezgehanê ma bire daye ke xo ver bidê. Na eşkerayîye biba wesîleya xoverdayîşî. Iraq û Hewlêrî pê peymana serê Şingalî bire daye ke 1ê nîsane de hêzê Şingalî xo tasfîye bikerê la şarê ma xo ver da. Netîceya nê xoverdayîşî de welat û teberê welatî de planê serê Şingalî vindertî. Nika rewşa Şingalî asan a. Mîyanê 5 rojan de 55 keyeyî agêrayî Şingalî. No zî îsbato tewr pîl o ke Şingal de aramîye esta. Ma venga şingalijan danê ke wa pêro abigêrê warê xo.''

Faris Herboyî pare kerd ke wextê peyênî de înan Bexdad de xeylêk perran reyde pêvînayîşî kerdî û vat: ''Pêvînayîşê ma zêdê sîyasî bîyî. Zafê nê perran paştî daye waştişanê şingalijan. Şingal asan û aram o. Her kes vîneno ewro Şingal de çi qewimîyeno û êzidîyan rê senî teda yena kerdene. Wa hemwelatîyê ma nînan bivînê û abigêrê Şingalî.''