Endama Komelgeha Jinên Azad a Rojhelatê Kurdistan (KJAR) Rûken Nexede derheqê 25ê Teşrîna Peyêne Roja Têkoşînê Vera Şîdetê Serê Cinîyan a Dinya de ANFyî rê qisey kerd.

Rûkene Nexede ard ziwan ke 25ê Teşrîna Peyêne bi keda cinîyan ê xoverdayoxan vejîya werte û nê vatî: ''Ewro cinîyî dahîna zaneye yê û rêxistinkerde têgêrenê. Cinîyî konfederalîzmî ser munaqeşe kenê, rêxistinîya leşkerî ser xo aver benê. Pîya bi wertevejîyayîşê têgêrayîşê Apoyîyî  xeylê destkewteyê sey şorişê cinîyan, artêşbîyayîşê cinîyan û zanistê cinîyan ameyî destfînayene.

Tarîxî ra nata cinîyî ne hetê rûhî ra ne zî hetê fîkrî ra teslîmê zîhnîyetê camêrdê serdestî bîyî. Bado ke Rayber Apo vejîya werte cinîyî agêrayî eslê xo ser û mûsayî ke vera nê zîhnîyetê camêrdê serdestî  senî têkoşîn bikerê. Têgêrayîşê cinîyan ê Apoyî bi nê zanistî xo rêxistin kerd û hema zî nê binge de xo rêxistin keno. Rayber Apoyî seserra 21. sey serra şorişê cinîyan pênas kerd. Ma pê heme têkoşînê cinîyan ke heta ewro bîyî, serberz ê. Nê pêro têkoşînî bi keda pîle û bedelanê giranan bîyî. Şehîdanê ma sey embaze Roza, embaze Sara, embaze Şîrîne  zîndanan, koyan û bajaran de têkoşîn xurt kerd. Cinîyî sereberz bi felsefeya Rayber Apoyî tarîtî ra vejîyayî.''

Rûken Nexede bale ante felsefeya Jin Jiyan Azadî ser ke Rojhilat û Îran de tesîro gird afirna û wina vat: ''Bi Jin jiyan Azadî cinîyan heq, îrade û hêzê xo yo ke vîn kerdbi dî. Eynî wextî de semedê cinîyan û camêrdan nê persî ameyî rojdem; ez kam a, senî ciwîyena, semedê çinayî û ça de ciwîyena, bandure çîya, şîdet çîyo? Bi Jin Jiyan Azadî her kes bi hîşyar û dest pê persayîşê persan kerd. Felsefeya Rayber Apoyî biresa ça ûca de bedilnayîşî afirnena.

Rejîmê Îranî hinda bêçare mendo. Metodêko nêceribna nêmend. Nika krîzêk ciwîyeno. Vera komelî zexto gird est o. Binê nameyê dînî de vera cinîyan û ciwanan zexto giran est o. La şarî hinî rîyê nê rejîmî dî, bêters tewirê xo ramojneno û têkoşîn keno.''