Fermandaranê YPJyî ra Dilbirîne Kobanê bi wesîleya 8ê Adare Roja Cinîyan ANFyî rê qisey kerd.

Qiseykerdişê Fermandare Dilbirîne Kobanê bi kilmî wina yo:

''Destpêkî ra nata sîstemê serdestîya camêrdan tim vera cinîyan şer keno û yew mîqtar û sînorê nê şerî çin o. Mezgê camêrdan bi her hawayî û bi her metodî vera cinîyan şer û sûcî kerdî. Çunke sîstemê camêrdan wazeno ke cinîyan cewher, nasname û tarîx ê înan ra dûrî bivisno. Sîstem ge bi rayîrê dînî, ge bi rayîrê îqtîdar û dewlete nê çîyî kerdî. Teyna cinîyî ney komel û ciwanî zî hedefê sîstemî de yê. Sîstem bi metodanê şerê taybetî keno ke bi hedefkerdişê cinî û ciwanan komelan çin bikero yan zî komelî bêpawitiş bikero. Vera nînan erkê tewr pîlî ancî kewenê milê cinîyan. Ganî cinîyî vera nê sîstemî têkoşînêkê bêemanî bikerê. Ma sey hêzanê YPJyî vera nê ferasetî şer kenê.

YPJ Şorişê Rojawanî reyde yanî nê serranê peyênan de nêronîya. YPJ wayîrê tarîx û mîrasêkê pîlî yo. YPJ teyna hêzêko leşkerî zî nîyo. YPJ yew hêzê pawitişî yo ke tede keda Rayber Apoyî est a. Wexto ke DAÎŞî pêro dinya tersnayêne YPJyî bi cesaretî vera ci şer kerd. Çunke YPJyî pawitişê merdimatîye ra xo mesuldar dî. Ma do tim wayîrê na mesuldarîya xo vejîyê. Ma heta nika qetî têkoşînê xo ra fek vera nêda û nêdê. Ma perwerê armancanê xo yê. Sozê ma cinîyan rê est o; bedelê ci çi beno wa bibo ma do têkoşînê xo ra apey gamêke nêerzê.

Ewro YPJ teyna herême rê ney pêro dinya rê bi têkoşînê xo tesîr keno. YPJyî serkêşîya şerê vera DAÎŞî kerde. Cinîyê ke verê cû keyeyanê înan destûr nêdayêne ke teyna vejîyê teber ewro bi teşwîqê keyeyanê xo tewrê YPJyî benê. YPJ teyna kurdan ra zî nêno pê. YPJ teyna seba yew herême ney seba pêro dinya şer keno.

Her komelo ke hêzê ci yê pawitişî çin ê, mehkumê çinbîyayîşî yo. YPJyî mîyanê komelî de na raştîye hende rind aver berde ke komel bi xo aver şi. YPJyî sîstemê xo mîyanê komelî de awan kerd û bi rêxistinî, pawitiş û îdeolojîya xo zî hêzanê hegemonan ra qesasê xo gêno. Xora nê pêroyî netîceya bedelanê pîlan de qewimîyayî. 

Ça de bena wa biba her cinîye do raştîya xo mîyanê YPJyî de bivîna. Her cinîye ancax mîyanê YPJyî de eşkena hêzanê hegemon, kanwaz û îqtîdarperestan ra qesasê xo bigêra. Ganî ma seba vurnayîşê ferasetê komelî têkoşînêkê hîna bi hêzî bikerê. Nê esasî ser o armancê ma no yo ke ma rêxistinîya xo aver berê.

Nika verê ma de 8ê Adare est o. 8ê Adare roja sozê ma yê pîlkerdişê têkoşînî ya. Eke pêro dinya de cinîyî 8ê Adare fîraz kenê sebebê ney bedelê giranî yê. Ganî her cinîye bi nê ruhî 8ê Adare fîraz bikera. YPJ merkezê pawitişê pêro cinîyan o û ganî pêro cinîyî dormeyê nê merkezî de bêrê pêser. Seke mi vat YPJ wayîrê armancêkê stratejîkî yo. Mesuldarîya hêzanê YPJyî  vera sîstemê kolonyalîstî têkoşînkerdiş o.''