Fermandaranê YPJyî ra Sarya Efrîn ANFyî rê qisey kerd û qalê xoverdayîşê vera hêrişan kerd. 

Fermandare Sarya Efrîn vat:

''Şorişê ma 2012 ra nata dewam keno. Dewleta tirke qetî tehamulê şorişî nêkena. Coka Efrîn, Serêkanîyê û Girê Sipî ra dima verê xo da Minbic û Şehba. Minbic de pêkewtişê giranî est ê. Şarê Minbicî 2016 de binvistişê DAÎŞî ra dima hetê ma de yo.

Minbic de şerwanan reyde şarê ma xo ver dano. Îsbatê ney xoverdayîşê Awbendê Tişrînî û Pirdê Qereqoxazî yo. Rixmo ke wird cayî qij ê dewleta tirke bi rojan o nêeşkayî nînan bivisna destî.

Minbic de şarê ereb û kurdî pîya ciwîyenê. Şarê erebî ganî kerdişanê dewleta tirke xo vîr a nêkero. Dewleta tirke wazena ke şaran qir bikera. Heyf ke hêzê mîyanneteweyîyî verê ney de bêveng ê.La ma hê şer kenê û amade yê ke seba şaranê xo ganê xo bidê.

Înanê ke vizêr îdîa kerdêne ke muxalîfê rejîmê Baasî yê nê ewro bîyê cergê dewleta tirke. Nê hêzî rojêke do fam bikerê ke xeletîye kenê la do erey bibo.

Hêzê ma yê YPJyî her ca de Tişrîn û Qereqozaxî de bi rojan o bêmabên xo ver danê. Şerwanê ma fedakarîyanê pîlan kenê û îradeyêkê xurtî mojnenê ra. Şerwanê ma heta peynî do wina şer bikerê.

Dewleta tirke sere de Til Temir, Tirwezîyê, Eyn Îsa xeylê xetan rê sewqîyatanê pîlan kena ke hêrişê Kobanê bikera. La kam hêrişê Kobanê bikero do raştê Şerê Şarî yê Şorişgêrî bêro. Ma do her mewzî de şarê xo reyde şer bikerê, Kobanê û erdê bînî bipawê. Kobanê kelaya xoverdayîşî ya ke do qetî nêkewa war.

DAÎŞ keno ke hêrişanê dewleta tirke ra firsend bivîno û ancî hêriş bikero. Hetê bînî ra mîyanê HTŞ û cerganê dewleta tirke de cergê DAÎŞî est ê. Na babete de hêzê Koalîsyonê Mîyanneteweyîyî ganî erk û mesuldarîyanê xo bîyarê ca.

Ez venga pêro şaranê ma danê ke nê prosesî de sey vizêrî ewro zî herê şerwananê xo de cabigêrê. Ciwanî seba ke dersa dewleta tirke bidê ganî refanê YPJ-YPG-QSDyî de cabigêrê.''