Fermandara Pêroyî ya YPJyî Newroze Ehmed serebûtê sîyasî û komelkî, têkoşînê û serkewtişê YPJyî yê serra 2020î ANFyî rê ercnayî.

Qiseykerdişê Newroze Ehmed ra beşêk wina yo:

''Efrîn de ma şarê xo rêxistin kerd. Uca de rayberîya cinîyan de xoverdayîşêko xurt ame kerdene. Bi hêrişanê sey tacîz û tecawuzî yeno waştene ke îradeyê cinîyan bêro çinkerdene. Dewleta tirke ya îşxalkere Efrîn de bi taybetî cinîyan kena hedef. Hêriş û kerdişê dewleta tirke yê vera cinîyan ê DAÎŞî ra xirabêr ê. Ma sey YPJ wazenê cinîyan her war de perwerde bikerê. Têna Efrîn de nê her cayê herême de vera cinîyan hêrişê winasênî estê. Ganî ma rêxistinîya xo xurtêr bikerê, qesasê xo bigêrê. No wezîfeyê ma yê pêroyînan o. Her cayê herême de ma vera îşxalkeran wazenê şarê xo zêdêr bipawê. 

Wexto ke ma DAÎŞ qedîna ma vat ke ma do têkoşînê xo dewam bikerê.Xora dima zî 2020 de Efrîn, Serêkanîyê, Girê Sipî ameyî îşxalkerdene. Ma do bi tecrubeyê xo yê şerî qelsîyanê xo çareser bikerê. Ma 2020 de xîret kerd ke vera hêrişanê dewleta tirke vejîyê, taktîkanê xo bizêdînê û xo newe ra awan bikerê. Ma xîret kerd ke xo bipawê, derban bidê înan ro û şarê xo bipawê. Emser nê waran de ma giranîye daye xebatanê perwerde û akademî.

Hêrişan de eşkera bi ke hêzanê ma xo hol rêxistin kerd û pawit. Heta ke destê ma ra bêro ma wazenê wayîrê destkewte û waştişanê şar û cinîyan vejîyê. Na serre ha qedîyena la wezîfe û mesuldarîyê ma berdewam ê. Hêzê YPJyî senî ke rayberîya şerê vera DAÎŞî de bîyî wayîrê rolêkê girîngî, rol û mîsyonî prosesê nikayênî de ma do rolê xo bizêdînê û zêdêr têbigêrê.

Herême de cinîyî vurîyayî û nê çîyî tesîrê beşan ê bînan ê herême zî kerd. Ma do xîret bikerê ke kênayanê ke tewrê YPJyî bîyî perwerde bikerê. Seba ke ma hewcedarîyanê şaran ê bînan ê herême zî bîyarê ca öa armanc kenê ke hêverî şorişê komelkî geş bikerê, herême bipawê. Kome de vurîyayîşêko bêhempa esto. Pêro cinîyî tewrê waranê sîyasî, zanistî û îdareyî benê û vanê 'Ma nê hêzî YPJyî ra girewt.' Na zî raştîyêke vejena werte û tesîrê winasênî virazena.''