Keyeyê Yerlîkayayî yo ke eşîra Hayderî ya qezaya Elcewazî ya Bedlîsî ra yo. Keyeyê Yerlîkayayî wextêko derg dewaya gonîye ra ant. Babî Hasan Yerlîkayayî coka keyeyê xo berd Adana. Tîya de keye Gelîya Çukurova de mişagîye kerde. Dadîye Zarîfe 1971 de kênaya xo Fîlîze menga gulane de arde dinya û vat: ''Vera zulmî ma bezreyî eştî û şitil (Fîlîz) da. Wa nameyê ci Fîlîze biba.''

Keyeyî 174 de narey koçê Wanî kerd. Fîlîze heta 6 serrîya xo tîya de bîye pîl. 1977 de erdlerzê Wanî de keyeyî narey verê xo da taxa Tuzluçayirî ya Anqara. Na taxe de zafêr kurdî û elewîyî mendêne û nê keyeyî xizan bîyî. Fîlîze wexto ke şîyêne zanîngehî tewra Yewîya Ciwananê Kurdîstanî (YCK) bîye. A pa 9 embazanê xo nîsana 1992yî de tewra gerîlayan bîye. 

La Fîlîze raywanîya tewrbîyayîşê gerîlatîye de zî zaf zehmetî antî.  Rojêke Bazîd de a kewte dafika dewleta tirke û tepişîyaye. Aye bi roja îşkence dî û zîndananê Bazîd, Erzirom, Nevşehîr û Kayserî de mende. Kanûnê 1992yî de zîndanî ra vejîyaye. A wextêk Anqara de xebitîyaye la dima reyna kewte rayîrî ke biba gerîla. Aye Îstanbulî ra verê xo da Serhedî, dima Tendûrek de mende, derbazê Şamî bîye û pa 4 embazanê xo resaye Warê Rayberîye. Aye nameyê Gulane xo rê weçîna. 

Fîlîze bi cîdîyetê xo, tewirê xo, dîsîplînê xo bala her kesî antêne. Gulane bala Rayberê Şarê Kurdî Abdullah Ocalanî zî ante. Gulane analîzê Rayberê Şarê Kurdî bi kêfweşî û dîqatî goşdarî kerdêne û fam kerdêne. 

Gulane perwerde ra dima bi waştişê xo şîye herêma Garzanî. 11ê gulane de Warê Rayberîye de merasîmî ra dima pa embazanê xo kewte rayîr. Aye Amed û Garzan zî tede Xinêre, Qendîl û Zapî de gerîlatîye kerde. 1999 de vera Komployê Mîyanneteweyî seba ke çalakîya fedayîye bikera şîye metropolanê Tirkîya. La wexto ke Rayberîye seba vindertişê çalakîyanê xovêşnayîşî veng da a zî agêraye. 

Kongreya partîye de Hêzê Taybetî ronîyayî û a zî tewra Hêzanê Taybetan bîye. Gulane wextêk fermandarîya Hêzanê Taybetan kerde û tewra Partîya Cinîyan a Azade (PJA) ya ke nika nameyê ci bîyo PAJK, bîye.

 * Gulane (Fîlîze Yerlîkaya) 7ê hezîrana 2002yî de netîceya komployêkê xayînî de şehîd bîye.