Unîversîteya Rojawanî ya  Qamişloyî de bi sloganê ''Ma do yewîya cinîyan û destkewteyanê şorişî bipawê û aver berê'' Forumê Şorişê Cinîyan ê Rojhelatê Mîyanênî ame kerdene.  Roja diyêne ya forumî de reyna derheqê problem û xoverdayîşê cinîyan ser ame qiseykerdene û qerarê muhîmî ameyî girewene.

Netîcenameyê forumî wina yo:

''Forumê Şorişê Cinîyan ê Rojawanî 22-23ê Temmuza 2022yî de Qamişlo de ame kerdene. Her hetê Sûrîye ra 200 cinîyî tewrê forumî bîyî  Rojhelatê Mîyanênî û dewletanê cîya cîyayan ra xeylêk cinîyî bi rayîrê zoomî tewrê forumî bîyî û mesajê paştdayîşî dayî. Pê forumî ame waştene ke prosesê şorişê cinîyan û netîceyê înan bêrê ercnayene û perspektîfê pawitiş û averberdişê şorişê cinîyan bêrê vilakerdene. Na çarçewe de netîceyê têkoşînê 10 serran, hêrişê vera şoriş û têkoşînê cinîyan, û tesîrê şorişî yê serê cinîyan û xeylêk babetê bînî ameyî mueneqeşekerdene û qerarê muhîmî ameyî girewtene.''

Nê qeraran ra tay wina yê:

- 10 serranê şorişî de gamê tarîxîyî erzîyayî û cinîyan serkewtişê girdî fînayî dest. Semedê pîlkerdiş û domnayişê şorişî forum de qerarê xurtkerdişê têkoşînî ame girewtene.

- Şorişê cinîyan raştê hêrişanê girdan ame. Têkoşînê şorişê ma hema tem nêrasayo hedefê xo. Semedê pawitiş û serkewtişê şorişî ganî şoriş bêro vilakerdene.

- Qenûnê cinîyan ê ke ameyî vetene sey serkewtişê şorişî hesibnê. Seba ke nê qanûnî bêrê caardene ganî têkoşîn pêroyê Sûrîye de bêro rayraberdene û xurtkerdene.

- Têhetameyîşê cinîyan o winayên serkewtişo pîl o. No eynî wextî de îtîfaqê demokratîkî yê cinîyan mojneno. Cinîyî ganî heme herêmanê Sûrîye de paştdayîşê xo girdêr bikerê.

- Şorişê cinîyan her çîyî ra ver şorişê hişmendî yo. Goreyê nê ganî têkoşînê azadîye bêro xurtkerdene.

- Wezîfeyê ma yo ke ma heme cinîyan îşxal, esaret û hepsî ra bixelisnê. Coka ma do têkoşînê xo xurt bikerê. Bitaybetî semedê azadkerdişê herêmanê îşxlakerdeyan Efrîn, Bab, Cerablus, Ezaz, İdlib, Serêkaniyê, Girê Spî ma do têkoşînê xo xurt bikerê.

- Hêrişê qirkerdişî bitaybetî vera cinîyan yenê kerdene. Ganî heme cinîyî vera hêrişan wayîrê hêzê xopawitişî bê û qet yew cinî bêpawitiş memano.

-  Ganî bêro zanayene ke bê îradeyê cinîyan çareserîya demokratîke û mendîye nêbena. Ganî cinîyî tewrê qeraranê sîyasîyan bibê û heqê cinîyan qanûnê bingeyî yê Sûrîye yo ke do ameyox de bêro kerdene de cayê xo bigêrê.