Endama Koordînasyonê PAJKî Şîmale Ulkem Guneş bernameyê Xwebûnî yê Jin TVyî de cewab da persanê rojnamegere Arjîne Baysal.

Qiseykerdişê Şîmale Ulkem Guneş ra tay noqtayê girîngî wina yê:

''Seba azadîya cinîyan 5 krîterî est ê; welatperwerîye, fikr û îradeyo azad, rêxistinbîyayîş, têkoşîn ê. Xoza de bê têkoşîn çîyêk nêbeno. Eke cinîyî mîyanê têkoşînî de bieşkê xo bipawê û nasnameyê azadîye bipawê eşkenê cîyabîyayîşê xo zî bipawê. 50 serrî verî cinîyê kurdî nêeşkayêne vajê ke ê kurd ê. La bi bedelanê pîlan û têkoşînê Rayber Apoyî ewro cinîyê kurdî resayê astêka berze. 

Xora nê xîret û xebatanê Rayber Apoyî yê serê cinîyan ra o 1999 de bi Komployê Mîyanneteweyî ame tepiştene. Xeylêk kesî ma û têgêrayîşê ma yê cinîyan nêşinasnenê. Têgêrayîşê ma teyna seba cinîyan ê kurdan têkoşîn keno. Dîyalektîkê ma pozîtîf û kerdox o. Ewro Kurdîstan, Rojhelatê Mîyanênî û dinya de serewedaritişê cinîyan o ercîyaye est o. Tewr peyên bi serewedaritişê 'Jin, Jiyan, Azadî' cinîyê kurdî hetê pêro dinya ra şinasîyayî. Cinîyê kurdî rixmê bedelanê giranan zî îlham danê cinîyanê dinya. 

Şer her çî çin keno. Ewro dewleta tirke vera hêzanê ma çekanê kîmyewî-nukleran şuxilnena. Dewleta tirke xîret kena ke gerîlayan çin bikera, xoza çin bikera, welatî çin bikera û tersî awan bikera. Coka ma hende giranîye danê xopawitiş û têkoşînî. Seba ke xopawitiş aver şoro zî ganî hêverî rêxistinbîyayîş aver şoro. Ma sey têgêrayîşê cinîyan ê kurdan eşkenê her ca de serkêşîye bikerê. Çunke xoîdarekerdişê cinîyan, xoserîya cinîyan, hêzê xopawitişî û îtîfaqê cinîyan mîyanê sîstemê ma de est ê. Ma rê nika koalîsyonê cinîyan lazim o. Têgêrayîşê cinîyan seba pawitişê xo ganî hêzê xo yê cewherîyî awan bikerê. Seba pawitişê cewherîyî zî ganî rêxistinbîyayîş est bo.''