Dîcle Arya ya ke Vakurê Kurdîstanî de rojnamegerîye kerdêne hêrişê dewleta tirke yê vera kedkaranê çapemenîye ra neçare mende ke derbazê Başûrê Kurdîstanî biba û o çax gerîla nas kena.

Gerîlaya YJA-Starî Dîcle Arya behsê hîkayeyê xo yê gerîlabîyayîşî kerd:

"Ez serra 1990î de Colemêrg de ameye dinya, keyeyêkê welatperwerî de bîya pîl. Serra 2009î de Zanîngehê Yuzuncu Yilî yê Wanî de bi rayîrê ciwananê wendekaran ê welatperweran mi têgêrayîşê azadîye nas kerd. Keyeyê mi zî welatperwer bi la mi zanîngeh de Rayberîye û têgêrayîşê ci fam kerd. Serra 2009î de hîna zêdêr hetê estbîyayîşê neweyî ra bîya nêzdî. O çax tewrê karê ciwanan bîya. Wexto ke mi karê ciwanan kerdêne dişmenî operasyonê qirkerdişê sîyasîyî kerd. Netîceyê operasyonî de ez zî ameye destbendkerdene. Dima ke ez ameye veradayene mi karê xo dewam kerd. Serra 2012î de seba zanîngehî şîya Anqara. O çax faşîstan hêrişê ma kerdêne. Nameerşawitişê zindanan seba nînan bi mana. Nê hêrişî seba mi zî bîyî destpêkê dewrêkê neweyî. Mi nê hêrişî sey hêrişêkê şexsîyî nêdîyî, nê hêrişî hêrişê vera kurdayetîya mi bîye. Dima mi bire daye ke bi hawayêkê çalakîyî ez tewrê karî bika. Serra 2012î de tewrê karê çapemenîya azade bîya. Mi wextêk Vakurê Kurdîstanî de kar kerd. Hêrişê dişmenan ê vera çapemenîya azade û kedakaranê çapemenîye zêde bibî.

Arya pare kerd ke hem hêrişanê dewleta tirke ra hem zî waştişê ci yê tewrbîyayîşî bire daye ke derbazê Başûrê Kurdîstanî biba. Arya serra 2013î de tewrê gerîlayan bîye û vat ke şer û qirkerdişê vera Rojawanî û Şengalî aye ser o tesîrêko pîl kerd û anye ra tewrê YJA-Starî bîye. Dîcle Arya îfade kerd ke zaf taybetmendîyê gerîlayan bala aye ancenê û vat: "Tim koyan ser o yê, şaristan ra dûr ê û mîyanê xozayî de yê. Gerîlayî wayîrê tewirêkê embazîye yê ke wexto ke dişmenî hêriş kenê seba ke çîyêk nêro embazanê ci ser, xo ser o fîşek û bombayan teqnenê. Wexto ke ez koyan ra gêrana pê hesîyena ke hîna zêde azad a."

Gerîlaya YJA-Starî Dîcle Arya serrgêra 41. a ronayîşê PKKyî fîraz kerde.