'Gerîlayê cinîyî şer de rolê rayberîye anê ca'

Fermandare Hêjare Zozan vat: ''Çalakîyê YJA-Starî têna Heftanîn de nêbîyî. Xerzan, Botan, Zagros û xeylêk waran de embazê cinîyî bi xurtî tewrê çalakîyan bîyî. Hetê profesyonelbîyayîşê embazan ê cinîyan ra emser hemleyê cîyayî estbî.''

Fermandaranê YJA-Starî ra Hêjare Zozana ke tewra kombîyayîşê Konseya Fermandarîye ya HPGyî bîye cewab da persanê ANFyî.

''Kombîyayîş de pratîkê YJA-Starî kamyew çarçewe de ame ercnayene?

Kombîyayîşê ma de pratîkê serran ê HPGyî ame ercnayene. Bêguman pratîkê embazan ê cinîyan yanî ê YJA-Starî zî ame ercnayene. Ercnayîşê xurtî ameyî kerdene. Çunke serra 2020î de milîtananê YJA-Starî şer de rolê pîlî kerdî.

Serre pê çalakîya embaze Sema Koçer dest pêkerde.  Dima Heftanîn de prosesêkê şerî dest pêkerd. Cengê Heftanînî de embazanê cinîyan rolê rayberîye ard ca. Bi taybetî yewîneya fermandare Esmere tesîrêko pîl viraşt û Heftanîn de pê çêrî şer kerd.

Emser embazanê cinîyan xeylêk çalakîyî kerdî. Xora hêzanê YJA-Starî hertim çalakîyî kerdêne. No yeno famkerdene ke cinîyî çend profesyonelî bibê, hetê leşkerî ra xo xurt bikerê hende çalakîyan kenê. Nê çalakîyî sey qesasê cinîyan zî wa bêrê ercnayene. Çunke serra vîyarte de dişmenî vera cinîyan xeylêk hêrişî kerdî. Înan kêna û cinîyan rê tecawuz kerd. Nê çalakîyî qesasê ê serebûtan bîyî.

Bêguman YJA-Star têna Heftanîn de çalakîyan nêkeno. Xerzan, Botan, Zagros û xeylêk waran de embazê cinîyî bi xurtî tewrê çalakîyan bîyî. Hetê profesyonelbîyayîşê embazan ê cinîyan ra emser hemleyê cîyayî estbî. Bi taybetî embaze Doga Zîlan bi hawayêkê fedayî rayberîya çalakîyan kerde. Nê embazê ma yê şehîdî rayberîya xo ma rê mîras verdenê. Ma do nê esasî ser o serra 2021î de bi xurtî tewrê çalakîyan bibê. Proseso hîra yê pratîkî derbaz bîyo. Labelê ma pratîkê xo ra mird nêbîyê. Ma eşkayêne bi temamî qesasê embazanê xo bigêrê. Na babete de kêmasîyê ma estê. Her çi ra verî Rayberê ma hema zî zîndan de yo. Coka ganî ma têkoşînê xo xurtêr bikerê. Na qerardarîya ma do morê xo bidê binê serra 2021î.

Seba cinîya mesajê şima çita yo?

Ez venga cinîyan dana ke YJA-Star hêzê cinîyan o. YJA-Star her ca de cinîyan paweno. Ganî cinîyî zêdêr tewrê gerîlayan bibê, xo bipawê û cewabê dişmenî bidê. Dewleta tirke hêrişê merdiman ê bêpawitişan kena. La eke cinîyî xo xurt bikerê, eşlenê cewabêk bidê dewlete. Coka ez venga cinîyan ê ciwanan dana ke tewrê YJA-Starî bibê. Ez pêro cinîyan rê têkoşînê înan de serkewtiş wazena.''