25ê teşrîna peyêne ya 1960î de Komara Domînîkî de Wayê Mirabele  Patria, Minerva, Maria yê ke vera dîkatatorîya Trujiloyî têkoşîn kerdêne, meyîtê înan binê kendalêkî de dîyayî. Eşkera bi ke Wayê Mirabele maruzê tecawuzî bîyî bi hawayêkê wehşîyî ameyî qetilkerdene. Neteweyanê Yewbîyayeyan 17ê kanûna 1999î de 25ê Teşrîna Peyêne sey Roja Têkoşînê Vera Şîdetê Serê Cinîyan îlan kerde.

Vervatoxa Têgêrayîşê Cinîyan ê Azadan (TJA) Ayşe Gokkan derheqê 25ê Teşrîna Peyêne de ANFyî reyde qisey kerd.

Gokkane îfade kerd ke ê tim vera sîstemê serdestîya camêrdan tim aktîf ê û vat: ''25ê Teşrîna Peyêne seba ma roja têkoşînê vera dîktatorîye ya. Ma sey TJA vera sîstemê serdestîya camêrdan sereyê xo nêrad war û ma tim têkoşîn kerd. 40 serran ra nata ma vera serdestan xo ver danê. Serdestîya camêrdan pêro Kurdîstanî ra vila bîya. Ma zî vera ney hêzê xopawitişî vet werte. Ma vera dîktatorîye 15ê êlule de kampanyaya xopawitişî daye destpêkerdene. 4 xebatê kargehê ma estê. Pawitişo meşrû seba ma rêxistinbîyayîş û perwerde yo. Ma armanc kenê ke xo biresnê pêro kuçeyanê Kurdîstanî.

Gokkane vist vîrî ke îqtîdarê AKP-MHP dişmenê cinîyan o û vat: ''Na stratejîya înan a û ê wazenê îdeolojîya azadîye ya cinîyan çin bikerê. Coka ê Peymana Îstanbulî seba nîqaşan eşte werte. Îqtîdar wazeno şîdetê vera cinîyan bibo meşrû. Ma vera naye xoverdayîşê xo her ca de dewam bikerê. Ma sey wayanê Mirabele 25ê Teşrîna Peyêne de vejîyê meydanan û heqanê xo bipawê. Ciniyê ke alaya wayanê Mirabele dewr girewte, seba cuya têdûşte do reyna vejîyê meydanan. Sîstem wazeno ke pêro destkewteyanê cinîyan çin bikero. La ma do her ca de waştişê xo yê azadîye biqîrê. Ma vera dîktatorîye bi şîarê 'Cinîye, Cuye, Azadîye' û 'Ma vera şîdetî xo pawenê' do meydanan de bibê.''