Kampanyaya Têgêrayîşê Cinîyan ê Azadan (TJA) ya bi nameyê 'Ma xo pawenê' 15ê êlule de Amed de dest pêkerdbi. Vervatoxa TJA Ayşe Gokkana ke nê wextê peyênî de operasyonanê vera cinîyan ê kurdan de xeylêk reyî ameye destbendkerdene, qala kampanya kerde.

Ayşe Gokkan vat: ''Kampanyaya ma Vakurê Kurdîstanî de ke tede hêrişê giranî qewimîyenê,bi hawayêkê cidîyî bîye rojdem. Kampanyaya ma ra verî şîdetê leşkeran ê uniformakerdeyan rî dabi. Îpeke Er û Gulîstane Doku ra berî Wan de gardîyanêkî Dîlane û Agirî de zî leşkerêkî Buşra kiştibî. Serebûtê kiştişî yê milîtarîst û seksîstê ke pê paştdayîşê dewlete qewimîyayêne, zêdîyayî. Şîdetê dewlete û camêrdî bîyî yew. Şîarê ma 'Ma xo pawenê' yo. Sembolê ma milçîkê sîmirî yo. Çunke ma xîret kenê ke sey sîmirî wela xo ra newe ra awan bibê. Ma hêverî destsernayîşê heqanê cinîyan rê vanê nê.Mîsal bi bahaneya hemserekîye tayînkerdişê qeyûman, vera îradeyê xoîdarekerdişî yê cinîyan darbeyêk a. Qeyûm îşxalkerî ya, hemserekîye xeta ma ya mor a. Bi nê hawayî ma verê îşxalî têgêrenê.''
Ayşe Gokkan ard ziwan ke cinîyî hînî bi hawayêkê komkî yenê destbendkerdene û vat: ''Seba şiknayîşê îradeyê cinîyan hêrişî pîlî yenê kerdene. Seba ke nêeşkenê îradeyê ma bişiknê ma destbend kenê. Zîndan hînî vurîya kampêka esîran. Ma kampanya de sûcê vera merdimîye ercnayî. Warê cuya ma de polîtîkaya tecrîdî esta. Ma zanenê ke tecrîdê Rayberê PKKyî Abdullah Ocalanî senî tesîrê komelî keno. Ma zanenê ke heta tecrîdê Îmraliyî nêşikîyo tecrîdê vera cuya ma zî nêşikîyeno. Ma tecrîdî rê zî vanê hînî beso.''

Ayşe Gokkan da zanayene ke înan çarçewa kampanyaya xo de xeylêk kargehî viraştî û vat: ''Ma heta nika 114 kargehî viraştî. Zêdîyayîşê şîdetî rojdemê ma yo. Ma nê şîdetî rê vanê bes o. Coka kampanyaya ma vera hîşmendîya serdestîya camêrdan têkoşîn o. Ma 7ê teşrîna peyêne de Cizîre, Gever û Pirsûs de çalakîyê Roja Têkoşînê Vera Şîdetê Serê Cinîyan dayî destpêkerdene. Nê herêmî herêmêsînorî yê ke dewlete bi bahaneyan hêrişê ci kena. Sey têkoşînê 3 wayanê Domînîkî ma ewro Tirkîya de têkoşînê xo kenê. Bi rayîrê nê polîtîkayanê Tirkîya cinîyan înan ra qesasê xo girewt. 25ê Teşrîna Peyêne vera hêrişanê serê cinîyan seba ma wextê têkoşînî yo. Coka ma apey game nêerzenê, ma nêtersenê. Çunke manaya 'cinîye, cuye, azadîye' bi xo na ya.''