Aynure Gonula ke erdê xo de bêtêdûştîya perwerdeyî ra nêeşkîya biwana û neçare mende ke koçê Îstanbulî bika kitabê xo yo yewînî yê şîîran ''Xewna Jiyanê'' weşanxaneyê Arê ra çap kerd. Gonule vana: "Eke cinîyêke biwaza eşkena ser bikewa."

Gonule dadîya di domanan a. Bi serran kargehê tekstîlî de xebitîya û dima seba xurtkerdişê ziwanê xo yê dayîke Enstîtuyê Kurdî yê Îstanbulî de perwerdeyê gramerê kurdkî girewt. Wextêk ra dima zî bi tecrubeyê xo û paştdayîşê cinîyan şîîrê xo kerdî sey kitabêk. Gonule kitabê xo de bi kurdkî behsê serebûtanê xo, hesretan, azadîye, vîrameyîşan, heskerdiş, estbîyayîş û vînayîşanê xo kena.

Gonule vana: "Domanîya xo de mi zaf waşt ke ez biwana. Mi xo ver da la nêbi. Wexto ke ez ameye Îstanbul seba ke ez biwana mi zaf xîret kerd. Ez şîya Enstîtuyê Kurdî yê Îstanbulî mi gramerê xo xurt kerd. Mi va ez eşkena bikera. Bîyayîşê dadîyêke seba şîîranê min ê kurdkî asteng nêbi. Seba ke şîîrê mi kurdkî bîyî mi xo hîna xurtêr hîs kerdêne. Bi nê hawayî mi waşt cuya xo de asîmîlasyon çin bika. Mîyanê teda û zorî de zî mi nuşt. Zaf kesan mi rê va ti nêeşkena. La mi ci ra fek vera nêda. Seba mi mucîzeyêk o. Bi paştdayîşê cinîyan mi no kitab çap kerd.

Ez şîîranê xo de behsê cinîyan kena. Çîyê ke ez nêeşkîya bikera mi şîîranê xo de behsê ci kerdî. Mi xo tewrê şîîranê xo kerd. Mi xeyalê cinîyêke kerdêne û a cinîye zî ez bîye.  Ez do nuştişê xo dewam bika. Bi ziwanê xo nuştiş hîsêko weş o."