Destbendkerdişê cinîyan ê bananê organîzasyonanê HDPyê Amed, Êlîh û Wanî kombîyayîşê çapemenîye ke banê Merkezê Pêroyî yê HDPyî de ame viraştene de ame şermezarkerdene.

 ‘GUVENE RAMOJNENA KE PROBLEM DO SENÎ HAL BIBO’

Parlamentera HDPyî yê Êlîhî Ayşe Acar Başarane vat ke Guvene seba waştişêkê şexsîyî nêkewta grevê vêşanîye û wina vat: “Leyla Guvene rixmo ke rehîn amîya girewtene nê, seba ke tecrîdê serê Îmraliyî wedarîyo û problemê şerî û pêkewtişan hal bibo kewte grevê vêşanîye yê bêdem û bêagêrayîşî. Seke ma vat no grev seba sebebêkê şexsî nê seba halkerdişê probleman vengê xo berzkerdiş o.

Birêz Ocalan 2011 ra nata avûkatanê xo dir û 2016 ra nata zî keyeyê xo dir nêeşkeno pêvînayîş virazo. Eke ewro Tirkîye xetimyaya û krîzê îqtîsadîyî mîyan de ya sebebê ci tecrîd o.”

Başarane qiseykerdişê xo rê wina dewam kerd: “Bi metodêkê wehşîyî kewtê bananê ma yê bajaran, mexmelê înan ê ke sembolê aşitîye yê erdan de pay dîyayî ser. Na çalakîya ke qîrayîşêkê aşitî ya, bê wucûdê xo zirar nêdana çewî seke nê fotografî de zî aseno mudaxeleyêko winayên ameyo kerdene.

Beno ke îqtîdar biwazo polîtîkayanê şerî açarno rantêk. La ganî bizano ke êyê ke aşitî wazenê do bi bindestkerdişan game pey de nêerzê.”

Başarane peynî de nê vatî: “Waştişê Leyla Guvene waştişê şarê Kurdî, yê cinîyan û şaranê Tirkîye yo. Ma do seba berzkerdişê nê waştişî û şikitişê tecrîdî her ca de mucadele bikerê û vengê tilîlîyanê xo berz bikerê. No rayîro ke îqtîdar ser o şino rayîr nêyo. Ganî nê rayîrî ra agêro. Ma do her ca de waştişê Leyla Guvene biyarê ziwan. Êyê ke vanê qey bi nê hawayî do cinîyî mucadeleyî ca verdê wa biewnîrê tarîxê mucadeleyê cinîyan ra.”