Wendekara Zanîngehê Munzurî Gulîstane Doku 5ê çeleyê 2020î ra nata 1000 rojî yo Dêrsim de vînîbîyaye ya. Hema zî derheqê vergumanan de tehqîqatêko cidî nêno kerdene.

Gulîstane Doku (21) tewr peyêne wexto ke verê pastaxaneyî de Zaynal Abarakovo ke babîyê ci polîs o, de nîqaş kerdêne hetê kamerayanê mobese ra amebî dîyene. Dima Gulîstane cinişte mînîbuse û a roje ra nata aqîbetê ci zî nêzanîyeno.

14ê çeleyê 2020î de keyeyê Gulîstane Walîyê Dêrsimî de pêvînayîş kerd. Dima 'mektubê xokiştişî' servîsê medya ame kerddene. La eşkera bi ke mektub hetê babîyê Abarakovî polîs Engîn Yucerî ra ameyo servîskerdene.

15ê çeleyê 2020î de çalakîyê seba Gulîstane ameyî qedexekerdene.

7ê adara 2020î de Engîn Yucer Dêrsimî ra keyeyê xo bar kerd

17ê hezîrana 2020î de avûkatê keyeyê Gulîstane seba tepişîyayîşê Abarakovî muracat kerd la muracat nêame qebulkerdene. 21ê temmuza 2020î de dima ke eşkera bibi ke Gulîstane 2 rojan hetê Abarakovî ra ameya remnayene û derbkerdene Çîmenî reyna seba tepişîyayîşî muracat kerd la reyna muracat ame redkerdene.

29ê temmuza 2020î de Walîyê Dêrsimî Tuncay Sonelî keyeyê Gulîstane tehdît kerd û waşt ke 'vengê xo nêvejê.'

7ê êlula 2020î de waye Aygule Doku û dadîye Bedrîye Doku Meydanê Seyîd Rizayî de dest pê çalakîya roniştişî kerd la pê şîdetî ameyî destbendkerdene.

11ê teşrîna verêne ya 2020î de waka Gulîstane Aygule Doku da zanayene ke xebatkarê Kizilayî Ferhat Hanedan Guven û Mudirê ÎŞKURî Ozdemîr Aktaşî 'bi fermanê walîyî' keyeyê Gulîstane tehdît kerdo.

22ê teşrîna peyêne ya 2020î de Augule Doku rê seba ke 'hewilnayîşê keyeyî yê Yucerî asteng kerdo' cezaya pereyî ya 50 hezar lîra dîyaye.

23yê teşrîna peyêne ya 2020î de Pirdê Uzunçayirî de xebatê cigêrayîşê Gulîstane reyna bênetîce qedîyayî.

5ê çeleyê 2021î de seba Gulîstane Doku çalakîyî ameyî kerdene.

21ê çeleyê 2021î de Engîn Yucer polîsîye ra ame girewtene

30ê hezîrana 2021î de Aygule Doku keyeyê xo reyde verê Edlîyeyê Dêrsimî de dest pê çalakîya roniştişî kerd.

1ê çeleyê 2022yî de keyeyê Gulîstane waşt walîyê Dêrsimî de pêvînayîş bikero la ame astengkerdene.

5ê çeleyê 2022yî de Meydanê Seyîd Rizayî de reyna seba Gulîstane Doku çalakîyî ameyî kerdene.

9ê çeleyê 2022yî de Vervatoxa HDPyî Ebru Gunay, Wekîlanê HDPyî Feleknase Uca, Alîcan Onluyî û Meclîsê Mayanê Haştîye keyeyê Gulîstane zîyaret kerd.

20ê çeleyê 2022yî de Engîn Yucerî rê seba ke 'agahîyê şexsî yê serê Gulîstane vila kerdê' cezaya zîndanî ya 2 serran û 6 mengan dîyaye.

27ê çeleyê 2022yî de eşkera bi ke Zainal Abarakov şîyo Rûsya û hayîya walîyê ê çaxî Tuncay Sonelî zî pê ney est a.

22ê sibata 2022yî keyeyê Gulîstane Meclîs de HDP zîyaret kerd û Hemsereka HDPyî Pervîne Buldan de qisey kerd.

23ê sibata 2022yî de keyeyê Gulîstane verê Wezîrîya Edaletî de dest pê çalakîya roniştişî kerd la hetê polîsan ra erdî ra ame kaşkerdene û destbendkerdene.

17ê adara 2022yî de Zaynal Abarakov qezaya Alanya ya Antalya de ame destbendkerdene. La 18ê adare de pê şertê kontrolê edlîyî vera dîya.

23ê gulana 2022yî de keyeyê Gulîstane Kuçeyê Hunerî ra ver bi Meydanê Seyîd Rizayî çalakîya rayraşîyayîşî kerd.

24ê gulana 2022yî de keyeyê Gulîstane verê Walîtîye de vat: ''Gulîstane Doku kotî de ya?''

10ê hezîrana 2022yî de merasîmê mezunîyetî yê Zanîngehê Munzurî de wake Aygul Doku waşt ke vejîya sehne ser û aqîbetê waya xo pers bikera. La asayîşê taybetî bi şîdetî verê aye girewt.

28ê hezîrana 2022yî de dîmenê peyênî yê Gulîstane ameyî erşawitene Buroyê Krîmînalî.