Partîya Şaran a Demokratîke (HDP) 20ê Teşrîna verêne de do Amed de ‘Komxebata Îdarekarîyê Cayîyî‘ virazo.Yeno pawitene ke kîşta hemserekanê HDPyî Pervîn Buldan û Sezaî Temelî de sîyasetkaro kurd Ahmet Turk, hemvervatoxê Kongreya Demokratîke ya Şaran (HDK), hemserekê Kongreya Komela Demokratîke (KCD) Berdan Ozturk, aktîvîstê Têgêrayîşê Cinîyanê Azadan (TJA) a pîya pabesteyê HDPyî û îtîfaqî tewrê ci bibê.  

 Îdarakaranê HDPyî yê Îdarekarîyê Cîyayî ra Yurdusev Ozsokmenlere banê partî ya Amedî de kombîyayîşê çapamenî viraşt û derheqê xebatanê înan de zanayîş da.  Ozsokmenlere da zanayene ke ê do na komxebate de heta ewro kêmîye ke kerdî nînan ser o bivindî  û seba xebatêka holêr bivejî orte têbigêrî.

Ozsokmenlere vist vîrî ke DBP û HDP serra 1999î ra heta nika bi cîya nameyan bi zî, derheqê Îdarekarîyê Cayîyî de wayîr tecrubeyêko girdî yê û wina va: ‘‘Xebatanê şaredarîye de gamê girdî ame eştene la xeylî kêmîye û xetayî  zî bibî. Nika seba nê kêmîyan ra dersvetişî ma  heme pabesteyanê xo ya pîya do bêrî têhet û o polîtîkaya newe ya  model û pratîkê şaredarîye tesbît bikerî. Ma do kêmîya xo temam bikerî û bi modelêko  holêr vejîyo vera şarê xo.‘‘

Ozsokmenlere qiseykerdişê xo rê wina dewam kerd: ‘‘Na çarçîwe de rayberîya ma de do 20 bajaran de kombîyayîşê winayenî berî viraştene. Reyna ma peşnîyazê sendîqa û rêxistinanê Tirkîya zî genî û seba fikrê şarî girewtişî zî xebatê ma estî. Yeno zanayene ke ma tena qanûnî ra giredayê nêmanenî. Vatiş û kerdiş o meşrû ma de esas o. Coka ma goreyê waştişê şarî têgêrayîşî rê dewam kenî.‘‘