Meclîsê Cinîyan ê HDPyî bi şîarê ''Ma do pîya bivurnê, nika wextê cinîyan o'' startê çalakîyanê 8ê Adare Roja Cinîyan ê Kedkaran a Dinya Alsancak-Îzmîr de da. Cinîyan verî pê kincanê xo yê herêmîyan deyîrî vatî û govende girewte. Cinîyan tîya de sloganê sey ''Denîze Poyraz bêmerg a'', ''Biciwîyo têkoşînê cinîyan'', ''Cinîye, Cuye, Azadîye'' vatî. Vervatoxa Meclîsê Cinîyan Ayşe Acar Başaran, wekîlî Serpîl Kamalbay, Dilşat Canbaz, dadîya Denîze Poyraz Fehîme poyraz û xeylêk dezgehê cinîyan beşdarê eşkerayîye bîyî. Eşkerayîye ra verî polîsan dormeyê cinîyan girewt. 

Verî Wekîle Kemalbaye vera barîkatê polîsan nêrazîbîyayîşê xo mojna û hişyarîye daye înan. Kemalbaye da zanayene ke dewlete cinîyan nêpawena û cinîyan asteng kena. Kemalbaye vat: ''Têkoşînê cinîyan vera teda û barîkatan qetî do mevindero.''

Ayşe Acar Başaran vat: ''Bînaya ma de Denîze Poyraz bi hawayêkê barbarî ameye qetilkerdene. Polîsê ke ewro dormeyê ma de barîkatî kenê înan paştî dayêne kiştoxê Denîze Poyraz. Cinîyî do apey gamêke nêerzê û têkoşînê ma do faşîzmî pûç bikero. Her roje şîdetê cinîyan zêdîyeno. Dewlete, medya û mehkemeyî şîdetî teşwîq kenê. Peymana Îstanbulî destkewteyêko tarîxî yo. Ma do tira fek vera medê. 

Polîtîkayê tecrîdî zîndanan de xorin benê. Cinîyî zîndanan de teda, îşkence û zulmî de têrî manenê, tepişteyê nêweşî vera nêdîyê. Aysele Tugluka ke rûmeta têkoşînê azadîye ya rixmo ke vîrê ci şîyo zîndan de tepişîyena. Ma do nê rejîmê îqtîdarî bivurnê û herinda ci de bi azadîya cinîyan demokrasî awan bikerê. Ma do her ca de têkoşînê xo rê dewam bikerê. Ma do seserra 21. bikerê seserra cinîyan.''

Eşkerayîye bi sloganan qedîyaye.