Rayberê Şarê Kurdî Abdullah Ocalano ke 27’ê Temmuze ra nêverdayî avûkatanê xo bivîno, bi prosesê neweyî yê Temmuz a 2015’î tecrîdo qetî serê ê de ame ronayene, heme heqê ê ameyî destesernayene. Hemsereka KCD’yî Leyla Guvene ke Zîndanê Amedî yê Tîpê E’yî de rehin ameyêne girewtene roniştişê 7’ê Teşrîna Peyêne de eşkera kerd ke seba tecrîdê serê Ocalanî biqedîyo a dest bi grevê vêşanîye kena.

Xoverdayîşo ke no 199 rojî yo bi serkêşîya aye dewam keno, pîya bi zîndanan Hewlêr, Strasbourg û xeylî cayan de vila bi û hemverê faşîzmî de bi hemleyêk. pêvînayîşo ke dewlete bi Mehmet Ocalanî da kerdene, roja 79'ine ya xoverdayîşê Guvene de sey gamêka taktîke amî dîyene. Dimayo ke 15 tepişteyî kewtî rojeyê mergî, dewlete verda ke dimayê 8 serran avûkatî Ocalanî bivînê. Leyla Guvene, grevkerdoxan ê tepişteyan û yê ke teber de yê vatî na tena reyêk a, ganî tecrîd bi temamî wedarîyo. Dima ra 15 tepişteyanê bînan zî dest bi rojeyê mergî kerd. Bi xoverdayîşo ke keweno menga 7’ine, bi serkêşîya mayanê mexmelsipîyan, bi hîsdarîya cimatkîye bi sebeb ke dewleta ke binê îdareyê AKP-MHP’yî de ya game bierzo û avûkatan roja Pancşemeyî reyna Ocalan dî. Avûkatan vizêr vat ê do derheqê grevanê vêşanîye de fikranê Ocalanî biresnê Leyla Guvene û tepişteyanê bînan, dimayê munaqeşeyan ra do hayîdarîyêka hîraye bidê.

Heme Tepişteyî Kewtî Grevê Vêşanîye

Dimayo ke Leyla Guvene grevê xo bi qerardarîye domna, tepişteyê PKK û PAJK’î yê ke zîndananê Kurdistan û Tirkîya de bîyî 27’ê Teşrîna Peyêne de kewtî grevê vêşanîye yê bêdem û biagêrayîşî. Dima ra dewlete goş nêda na hîşyarîye û naye ser tepişteyî 16’ê Kanûne de kewtî grevê vêşanîye yê bêdem û bêagêrayîşî. Sibate de 67 zîndanan de 350 tepişteyî kewtî grevê vêşanîye yê bêdem û bêagêrayîşî. Rixmê nê de zî dewlete goş nêda waştişê înan û 1’ê Adare de heme zîndanan de tepişteyan dest bi grevê vêşanîye yê bêdem û bêagêrayîşî kerd. Mîyanê çalakgeran de hemserek, parlamentere verênî, hemşaredar û xeberdarî zî estbî.

Grevê vêşanîye yê parlamentera verêne Sebahat Tûncele û Selma IRmake kewt roja 130’î. Grevê vêşanîye yê Strasbourgî kewt roja 161’ine. Parlamenteranê HDP’yî Dersim Dage 3’ê Adare de û Tayyîp Temel û Mûrat Sarisaçî zî 8’ê Adare de Amed de dest bi grevê vêşanîye kerd. Hetêna ra Hewlêr de Nasir Yagiz no 186 rojî yo, Mexmûr de Fadîle Toke 130 rojî yo û Germîyan de zî Herêm Mehmûd 91 rojî yo grevê vêşanîye de yo.

7 Tira Tepişteyî 8 Şehîdî

Bajarê Krefeldî yê Almanya de 20’ê Sibate de Ûgûr Şakarî hemverê tecrîdî de adir verda bedenê xo û 22’ê Adare de cuya xo vînî kerde. Zulkuf Gezenî (33) 17'ê Adare de hemverê tecrîdî Zîndanê Tekîrdagî yê Tîpê F-2’yî de, Ayten Beçete (24) 23'ê Adare de Zîndanê Gebze de, Zehra Saglame (23) 24'ê Adare de Zîndanê Otlû yê Tîpê T’yî de, Medya Çinare (24) 25'ê Adare de Zîndanê Mêrdînî yê Tîpê E’yî de peynî ro cuya xo arde. Yonca Akici 29’ê Adare de Zîndanê Şakranî yê Cinîyan de çalakî viraşte û 1’ê Nîsane de cuya xo kerde vînî. Siraç Yuksekî 2’ê Nîsane de Zîndanê Osmanîye yê Tîpê T-2’yî de û Mahsûm Pamayî zî 5’ê Nîsane de Zîndanê Xarpêtî yê bi Asayîşê Berzî de bi heman amacî çalakî viraşte û cuya xo kerde vînî.

30 Tepişteyî Rojeyê Mergî de

15 tepişteyan 30’ê Nîsane 2019 ra tepîya grevê vêşanîye açarna bi rojeyê mergî. Zîndanê Bakirkoyî yê Cinîyan ê Girewteyî de Nesrîn Akgule, Şukran Aydine û Zozan Çîçeke, Zîndanê Gebze yê Cinîyan ê Girewteyî de Ardil Çeşme û Asli Dogane, Zîndanê Wanî yê bi Asayîşê Berzî yê Wanî de Ahmet Anigi, Ozhan Ceyhan, Vedat Ozagar, Îhsan Bûlût û Erol Cengîz, Zîndanê Amedî yê Tîpê D’yî de zî Ergîn Akhan, Enver Donmez, Ahmet Topkaya, Abdulhalik Kaplan û Ferhat Tûrgay kewtî rojeyê mergî.

Dimayê na grûba ewilêne ya rojeyê mergî ra grûbêka dîyine ya 15 tepişteyan 10’ê Gulan a 2019’î ra tepîya dest bi rojeyê mergî kerd. Zîndanê Kandira de Yaşar Cînbaş, Mûhammed Înal, Dîyadîn Akdemîr, Engîn Kahramanî, Zîndanê Bolû yê Tîpê F’yî de Îbrahîm Dogan, Ahmet Emîn Eren, Mûstafa Taştanî, Zîndanê Patnosî de Sena Efe, Bûrhan Şik, Faysal Aktak, Şefîk Kayhanî, Zîndanê Tekîrdagî Hûmara 1’yî de Reşat Ozdolî, Zîndanê Tekîrdagî yê Hûmara 2’yî de Zekî Bayhan, Yilam Yildizî û Zîndanê Wanî de zî Saît Ozturkî dest bi rojeyê mergî kerd.

Mayî Xover Danê

Dimayo ke grevê vêşanîye yê tepişteyan kewt menga 4’ine bi serkêşîya mayan û merdimanê înan xoverdayîşêko newe dest pêkerd. Rixmê heme astengî û zextanê dewleta Tirkî de xoverdayîşo ke verê berê Zîndanê Gebze de dest pêkerd, Meydanê Esenyûrtî, Parkê Koşûyolû yê Amedî, verê Zîndanê Bakirkoyî, Parkê Îsmet Înonu yê Edeneyî de vila bi. Mayan bi mexmelanê xo yê sipîyan hemverê zordarîya hêzanê Tirkan de xover da û şîyî Enqere de pêvînayîş kerd. Mayî domananê xo rê û waştişê wedartişê tecrîdî rê wayîr vejîyayî û bîyî sebeb ke serê hukmatê Tirkî de zextêko zêde yê rayapêroyîye virazîyo.

Guvene: Tecrîd do Wedarîyo

Guvene derheqê nê xoverdayîşî de vatibi: “Mi waşt ke na tarîtîye de bibî veng, nêzana do çew vengê mi bişinawo yan nê, do kes mi bivîno yan nê. Ez zîndan de bîya û nuqtayêk ke bi giranî înan waştêne sîyaset bêro qedînayene, mi waşt ke tarîtî de bibî qîrayîşêk. Mi kerd ke bidî famkerdene Ocalan tepitşeyêko alelade nêyo û ez vana qey no ameyo famkerdene. Pêvînayîş ame kerdene û vengê Ocalanî resa teber. Ez bawer kena ke do hîna zaf pêvînayîşî bêrê kerdene, tecrîd do bi temamî wedarîyo, halêkê azadêr û rindêrî de ma do bêrê têhet. No beno ke sey utopya bo, la ganî nêro xovîr ra kerdene ke utopyaya ke bica nêameya nêno a mana ke do bica nêro.

Û Pêvînayîşo Dîyin Ame Kerdene

No mabên de înan cewabêko pozîtîf da avûkatanê Ocalanî ke tim seba pêvînayîşî muracat kerdêne. Avûkatî Rêzan Sarica û Newroz Ûysale roja Pancşemeyî şîyî Îmrali û ancî pêvînayîş kerd. Avûkatan roja Îneyî hayîdarîyêka kilmeke daye û vat, ê do fikranê Ocalanî yê derheqê grevê vêşanîye biresnê tepişteyan û xoverdayoxanê bînan, derheqê nê de munaqeşeyan bikerê û wextêkê kilmekî de rayapêroyîye hayîdar bikerê.